A rôh krếo phôn tơpui, pôa Phạm Minh Chính, Ngế pro xiâm hnê ngăn tơnêi têa pa môi hdroh nếo rơkâu Singapore tơkŭm po klêi tơniăn hneăng tâ phĭu.  Ngế pro xiâm hnê ngăn tơnêi têa loi khât ƀă tơnêi têa ki kuăn pơlê Singapore hiăng pơcháu, pôa Lawrence Wong, Ngế pro xiâm hnê ngăn kong têa kô chông djâ dêi kong têa, mơnhông dêi kong têa Singapore kâi tơkâ luâ tŭm tơdroăng pá, pơloăng mơnúa, pơtối mơnhông tơniăn, hơniâp ro, kro mơdrŏng.

Tơpui ‘na tơrŭm cheăng pơla Việt Nam ƀă Singapore, pôa Phạm Minh Chính pơkâ thế péa pâ mơdêk rơdêi tơrŭm cheăng, po rơdâ  ki khu mơdró dêi Singapore ’no liăn cheăng a Việt Nam, malối tung kơvâ kŏng ngê̆ ki lĕm dâi túa nếo nôkố, on tơhrik vêh pro, tơmeăm khoăng troăng prôk ƀă mơnhông kơphô̆ krá kak; mơdêk tơrŭm tung mâu kơvâ pro on tơhrik kơtâu ƀă khía, tơpui tơno pơ’lêh ăm dêi pó trếo carbon, pơ’lêh liăn ngân, mơnhông kơno tuk ƀă hbrâ mơdât mâu khu ‘mêi ki ai xôi tơkâ luâ tơnêi têa.

Péa Ngế pro xiâm hnê ngăn vâ môi tuăn kô tơpui nhên ‘na tơrŭm cheăng péa pâ  ƀă mâu tơdroăng ki ê drêng troh hneăng Hôp kân mâu kăn xiâm ASEAN la ngiâ a Malaysia.