Hâi xah hêi roh tơkŭm po tung péa hâi, lơ 12 ƀă 13/4, ƀă veăng amê ai lối  800 ngê̆ nhân, kuăn pơlê mâu hdroâng kuăn ngo troh ing 17 tơring, pơlê krâm, pơlê kong kơdrâm tung kong pơlê Gia Lai. Ƀă dó inâi ‘’Chuât xơtó troh rơdâ’’, tơdroăng pơxiâm po ƀă tơdroăng vêh mơhno um méa pơlê pơla mâu hdroâng mơngế rơtế tơkŭm a ‘’pơlê tơdjuôm’’ – tíu tơkoh khôi túa lĕm, tơdjêp tơdroăng loi tơngah, rơtế tơmiât troh pơkâ xiâm mơjiâng Gia Lai kro mơdrŏng lĕm, tơrŭm môi tuăn ƀă mơnhông krá tơniăn. Pơtối mê cho tơdroăng ngê̆ thuât ƀă mâu tơdroăng tôu chêng koăng mơhno ki lĕm ro dêi tơdroăng rêh khôi túa lĕm tro vâi krâ nah, tơdroăng pói vâ xông mơ-eăm dêi kuăn pơlê mâu hdroâng kuăn ngo.

Klêi kơmăng pơxiâm po, mâu khu ngê̆ nhân hiăng mơđah tơbleăng, vêh pro tơdroăng leh khôi túa lĕm ki má môi mơtiah: Leh Tơdah têa vêh a pơlê, mơdĭng kâ kơpôu ro, leh Pâ mơnê, leh Sơmă Kơcham, ngê̆ thuât rơhdruê tuồng, chêng koăng, klŏng put hdroâng mơngế, pong rơgi loăng, teăn tơmeăm, tĕn ếo pơtâk...

Jâ Lê Thị Thanh Thủy, Kăn hnê ngăn Mơhno túa lĕm tro – Tơdroăng kal ƀă Tơ’noăng ivá tơring ‘Mang Yang, kong pơlê Gia Lai, tối ăm ‘nâi:

‘’ ‘Mang Yang djâ troh hâi xah hêi ro mâu tơdroăng ki má môi. Pakĭng mê, á pói vâ hâi xah hêi ro châ pơtối mơđah tơbleăng vâ rah mâu khôi túa lĕm dêi mơngế hdroâng kuăn ngo Bơhnéa ƀă mâu hdroâng kuăn ngo ki ê tung kong pơlê’’.

Hơnăm kố, khu ngê̆ nhân pơlê kong krâm Ayun Pa ai 46 ngế veăng hên tơdroăng xiâm ki má môi mơtiah mơđah tơbleăng chêng koăng, teăn ếo pơtâk, veăng mâu tơdroăng xah hêi tiô khôi vâi krâ nah... Ngê̆ nhân Nay Ka ối a Ƀon Phu Ama Nhuer 2, cheăm Ia Rtô, pơlê kong krâm Ayun Pa, tối:

‘’Khu ngê̆ nhân pơlê kong krâm Ayun Pa ngin kô vêh pro tơdroăng leh ‘’Kâ Pơthi’’ (Huă Blan) – môi khôi túa vâi krâ nah ki má môi dêi kuăn pơlê Jarai. Kố cho tơdroăng xối pleăng mơhúa mơngế hiăng hlâ dêi mơngế Jarai Cheo Reo. Tơdroăng vêh pro leh kố vâ vêh mơhno tơdroăng lĕm khôi túa lĕm ki má môi dêi hdroâng mơngế Jarai, vêh pơchân rơxông ối nếo hlê plĕng ƀă nhuô̆m mâu ki kơnâ khôi túa vâi krâ nah dêi pôa pâ’’.

Ngê̆ nhân Siu Thưm - ối a Plei Ku Roh, pơlê kong kơdrâm Pleiku, tối ăm ‘nâi, khu rơhdruê xuăng dêi thôn ai 40 ngê̆ nhân, kô tôu mâu ƀai chêng kơdrâm phiu ro mơtiah ‘’Phiu ro ƀlêi trâng’’, rơtế mâu tơdrá pêng păm khôi túa lĕm. Kố cho roh vâ tơbleăng troh tơmối mâu ki kơnâ khôi túa lĕm ki má môi dêi hdroâng mơngế pin:

‘’Roh kố ôh tá xê to tơ’noăng ƀă mâu khu ki ê, mê cho trâm mâ. Xua mê, ngin pói vâ djâ mâu tơdroăng ki má mối dêi mơngế Jarai a Pleiku tơbleăng bă mâu khu pú hmâ ƀă tơmối troh ƀă Gia Lai. Xua rơxông ngê̆ nhân pơrá phiu ro ƀă tá hiâm mơno’’.

Tíu kố hâi xah hêi ro hên mơngiơk lĕm khôi túa lĕm ƀă mâu tơdroăng môi tiah vêh mơhno tơdroăng hôp pơlê pơla, mơđah tơbleăng ếo pơtâk, xah rêi nhak, kơchâi kâ tiô khôi vâi krâ nah ƀă mâu tơdroăng xah hêi tiô khôi vâi krâ nah; mâu tíu mơđah tơbleăng tơmeăm ki má môi dêi pơlê môi tiah kơphế, drôu xiâm, tơxông prông, hơ’nêh pôh ƀă hía hé kum mơđah tơbleăng ki trâu hơngế ƀă tơdroăng ki ai hên khôi túa lĕm dêi kuăn pơlê mâu hdroâng kuăn ngo tung kong pơlê.