Lăm pro mô đô̆i drêng dế 14 hơnăm, mô đô̆i hneăng hdrối nah Lâm Xuân Quang, hơnăm kố 70 hơnăm, tối ăm ‘nâi:

‘’Rơnó hơngui hơnăm 1969 drêng á ối a tíu tơplâ xâ Peăng mâ hâi lo, á tâng Pôa Hồ Chí Minh, Kăn xiâm hnê ngăn tơnêi têa hneăng apoăng rơkâu Têt ing thơ...Tâng rơkong Pôa tơpui mơdêi tơdrăng, prông lĕm pro á tâ rơrêk tung hiâm mơno troh drêng lâi ah mê kô pro môi tíu koh pleăng Pôa Hồ’’.

50 hơnăm chúa vế tung tuăn ngôa, ti tăng mâu tơmeăm, troh hơnăm 2018, klêi kơ’nâi rơnêu toăng hngêi dế ối, pôa hiăng pơkâ ‘măn môi râ vâ pro môi ‘’tíu chôu ‘măn tơmeăm khoăng roh ton nah’’ krê ‘na Pôa Hồ Chí Minh, Kăn xiâm hnê ngăn tơnêi têa hneăng apoăng. Tâng tíu ki lâi ai tơmeăm, ‘noăng chư chêh ‘na Pôa Hồ Chí Minh, Kăn xiâm hnê ngăn tơnêi têa hneăng apoăng mê pôa ai mâ, lơ bu tâng rơ’jíu, tơvi, ƀai chêh ‘na Pôa Hồ Chí Minh, Kăn xiâm hnê ngăn tơnêi têa hneăng apoăng, pôa kô vêh chêh ‘măn.

Djâ ngin lăm ngăn kơpong mơđah tơbleăng kân rơdâ dâng 300 met karê, pôa Quang tối ăm ‘nâi mâu um, ‘noăng chư chêh ing hên tíu. Ki má môi, um méa ‘na troăng kân Trường Sơn, um toăng rơxế komƀa klâm a bo hngêi Dinh Độc Lập kơhâi dế lơ 30/4/1975 rơtế hên um roh ton nah châ pôa Quang vêh mơhno nôkố ki lĕm ro dêi tơdroăng rêh péa pâ kơnâng hngêi ối krê dêi pôa:

‘’Mot kơteăng apoăng mê hlo plâi tơnêi, vêh chêh troăng prôk lăm ti tăng troăng tŏng gum tơnêi têa dêi Pôa Hồ tơkâ hluâ 40 kong têa. Ing kố, Pôa Hồ Chí Minh, Kăn xiâm hnê ngăn tơnêi têa hneăng apoăng châ tơkŭm tuăn ngôa rơkê, túa pêi rơkê, tơdroăng pói vâ hơniâp lĕm – tơniăn krê hdroâng mơngế, hiâm mơno khên tơnôu Hồ Chí Minh vâ vêh pơkuâ kăch măng châ tơƀrê. Ƀă kố cho Pác Bó, têa kroăng Lê Nin, ngo Các-Mác, kố cho Hneăng hôp Diên Hồng hơnăm 1945... Ƀă kố cho 2 tơmeăm ki tơbâ ton nah ki Pôa xúa hên má môi cho Kơmăi po chư ƀă rơ’jíu... Ƀă kố cho um mâu toăng hngêi peăng Kơnhŏng, peăng hdroh, ƀă têa kroăng, têa kơneăng, plong... châ ‘măn a kơpong mơđah tơbleăng, môi tiah vâ tối hiâm mơno dêi kuăn pơlê Peăng hdroh tơnêi têa koh tơdah Pôa Hồ Chí Minh drêng tơnêi têa tơrŭm chiâng môi’’.

Teăng ki lôu péa a mâu roh ki tơviah má môi, tíu chôu ‘măn tơmeăm khoăng ron ton nah krê ‘na Pôa Hồ Chí Minh, Kăn xiâm hnê ngăn tơnêi têa hneăng apoăng dêi pôa Quang luôn lôu péa drêng ai vâi troh ngăn. Pôa xuân pôu râng hnoăng cheăng hnê mơhno vâ tơbleăng tối mâu tơmeăm rơtế mâu tơdroăng ki lĕm ro dêi tơdroăng rêh, nếo ‘na Pôa. Pú hmâ Hoàng Ánh Ngọc, ối a Pơlê kong kân Hồ Chí Minh, troh lăm pôu ngăn ‘’Tíu mơhno khôi túa lĕm tro Hồ Chí Minh’’, tối:

‘’Á lăm rơtế ƀă nôu pâ ƀă mâu ngế pú hmâ dêi nôu pâ, mâu ngế mô đô̆i hneăng hdrối nah, troh lăm ngăn ‘’Tíu mơhno khôi túa lĕm tro tiô hiâm mơno Pôa Hồ Chí Minh’’ dêi meh Quang. Tâ rơrêk...Tơmeăm châ meh pro inhên, rơkê. Meh Quang thế tá hiâm mơno nếo chiâng pêi tơmeăm môi tiah kố. Rơxông ối nếo môi tiah ngin châ hlê plĕng tâ ‘na Pôa Hồ Chí Minh, Kăn xiâm hnê ngăn tơnêi têa, ‘na roh tơplâ xâ dêi hdroâng mơngế vâ châ ai tơdroăng tơniăn krê hâi kố’’.

A hơnăm 70, pôa Lâm Xuân Quang pói tơngah kô mơjiâng môi ‘’Tíu Hồ Chí Minh’’ ƀă kŏng ngê̆ 4D vâ mơhno tŭm um, tơmeăm ‘noăng chư chêh ‘na Pôa Hồ, Ngế kum kuăn pơlê Việt Nam ƀă pú hmâ lâp plâi tơnêi vâ ti tăng plĕng ‘na Pôa Hồ Chí Minh, Kăn xiâm hnê ngăn tơnêi têa hneăng apoăng tiô troăng tơdrăng păng ‘nâng, ki lĕm ro dêi tơdroăng rêh má môi.