Kơ’nâi 50 hơnăm tơnêi têa tơrŭm môi, tơdroăng chêh văn hok ngê̆ thuât a Dak Lak ai tơ’nôm hên ƀai chêh ki nếo tơƀrê, tối hên pâ nhoăm tơnêi têa ƀă tối hên ki lĕm tro, tăng chêh ‘na túa lĕm tro dêi mâu hdroâng kuăn ngo. Kong pơlê hiăng tăng ‘nâi plĕng ƀă riân châ hrĭng tơdroăng hơ’muăn hdrôu dêi Rơđế ƀă M’Nông, hơ’muăn xôi kiâ, rơpâu rơkong tơpui rơkâu pâ drêng xối tung mâu hâi leh mơdĭng dêi kuăn pơlê. Ăm hrĭng rơpŏng kơtum chêng koăng ƀă ếo pơtâk kuăn ngo, pơtối tơbâ tơdroăng pro mơdĭng, tơkŭm po hên pro mơdĭng tiô chal krâ nah, rơtế ƀă pơtối rak túa lĕm tro  ƀă mơnhông ôm hyô’’.

Ki hên mơngiơk tung um kơchuâ túa lĕm tro mâu hdroâng kuăn ngo hiăng pro a Dak Lak po rơdâ rế hên dêi văn hok ngê̆ thuât. Pôa Nguyễn Văn Cừ, Ngế pơkuâ cheăng kal kí ƀă hnê mơhnhôk Đảng tơring Ea Sup tối tiah kố, tơdroăng rak vế ƀă pơtối rak ki kơnía git túa lĕm tro ton nah vâ rế mơnhông văn hok ngê̆ thuât, xuân thế tơrŭm ƀă mơnhông ôm hyô rơtế ƀă cheăng kâ.

“Xo túa lĕm tro pêi cheăng kâ ƀă pơtối mê xo túa lĕm tro păn túa lĕm tro. Mơjiâng ôm hyô tơring Ea Sup, veăng prôk ngăn rơtâ tá long Ea Sup thượng, ngăn thôt Giang Prong, lăm pôu 5 pơlê a pơlê kân Ea Sup ƀă ai mâu ki tôu hơkâ, pế pơchên hmê kơchâi kâ, mơđah túa lĕm tro, po mơdĭng mê vâ kuăn pơlê mơnhông cheăng kâ dêi rơpŏng hngêi, ing mê pro môi kơpong pơ‘lêh klêng tê, mê cho cheăng kâ, túa lĕm tro, kal kí ƀă pơlê pơla mơnhông tơniăn’’.

Pôa Trần Doãn Tới, Phŏ pơkuâ hnê mơhnhôk cheăng kal kí ƀă Khu mơhnhôk cheăng kong pơlê Dak Lak ăm ‘nâi, pơtối mâu tơdroăng ƀlêi trâng, kong pơlê pơtối mơjiâng tơdroăng cheăng pêi, troăng hơlâ  mơnhông mơdêk văn hok ngê̆ thuâ̆t tung rơxông nếo:

“Khu pơkuâ cheăng kal kí ƀă Hnê mơhnhôk cheăng Đảng kong pơlê kô pơtối veăng tăng nâi plĕng ăm khu kăn pơkuâ hnê ngăn Đảng kong pơlê vâ ai hnê mơhno teăm tơdrêng, ing mê pro tro tâ nếo Pơkâ kơxô̆ má 23 ‘na văn hok ngê̆ thuât. Ƀă drêng pin mot tung rơxông nếo mơnhông tơná, tơtro ‘na tơnêi tíu, mơni tiah kố kô ai hên ki pơ’lêh ‘na văn hok ngê̆ thuât ƀă túa lĕm tro, tơbleăng ƀă pơtối rak ivá rơdêi tâi tâng túa lĕm tro dêi kơ pong kong ngo ƀă ki tối tung tơdroăng ‘na túa lĕm tro ngê̆ thuât dêi kơpong kĭng têa kơxĭ peăng Hdroh Tơdế tơnêi têa  drêng pin tơrŭm ƀă’’.

Vâ pêi mâu tơdroăng tung rơxông mơnhông tơƀrê, tơdroăng tơrŭm tơtro pơla túa lĕm tro – ngê̆ thuât  ƀă cheăng kâ, malối cho ôm hyô, kô po rôh ki kân ăm Dak Lak mơnhông krá ton, rak tơmeăm khoăng ƀă tơbâ tơdroăng hriăn plĕng ki nếo. Ing tơdroăng xiâm ton nah, túa lĕm tro hên vêa vong ƀă hiâm mơno pâ nhoăm tơnêi têa, văn hok ngê̆ thuât Dak Lak hâi kố pơtối mơnhông tơƀrê châ pơ-eăng troh hơngế, veăng mơjiâng môi Tây Nguyên kro mơdrŏng, hơniâp lĕm.