A roh leh, Ngế pro xiâm hnê ngăn tơnêi têa tối: Tơdroăng mot tơrŭm hên tơdroăng pá puât, laga pin mot tơrŭm ôh tá kơnôm, ôh tá tiô khu tơrŭm ki lâi; rế xúa roh, thăm veăng dêi mot tơrŭm, kâi trâng châ tơƀrê ƀă ki phá tơ-ê vâ mơnhông mơdêk rĕng, krá tơniăn.

Ngế pro xiâm hnê ngăn tơnêi têa tối: Khu kơlo têk chu FTA hiăng tơbleăng ‘noăng chư chêh tơdrăng, ôh tá tơdjâk pakong, tâi tâng ‘na kơlo pêi pro mâu tơkêa FTA a rêm kong pơlê; pro xiâm kối ki kal, kum Chin phuh ƀă mâu khu xiâm, kơvâ cheăng, kong pơlê pơkâ troăng pơkâ pêi, troăng hơlâ pơkuâ pêt mơjiâng tơmeăm, tê ngi kong têa ê, tơniăn tro tiô ki ai khât, chiâng pêi pro vâ mơdêk pêt mơjiâng tê mơdró, tê ngi kong têa ê.

Tơdroăng mơdêk tơpui tơno, kĭ tơkêa ƀă pêi pro 17 FTA ƀă tâi tâng mâu tơdroăng cheăng kâ, khu tơrŭm kân lâp plâi tơnêi, djâ Việt Nam chiâng môi tung mâu kong têa ối má môi kơpong ƀă lâp plâi tơnêi ‘na veăng mâu tơdroăng tơrŭm cheăng kâ pơla péa pâ ƀă hên pâ. Tơdroăng xúa, pêi pro châ tơƀrê mâu FTA xuân veăng kum mơdêk pêi lo liăn tê ngi kong têa ê tâk rơdêi, tơniăn yă ƀă mâu kơlo têk chu cheăng kâ kân, veăng kum kal khât, veăng tung tơdroăng mơnhông cheăng kâ dêi tơnêi têa.