Kong pơlê mơdêk rơdêi lăm ngăn ‘na tơniăn krúa kế kâ mâu tíu pế pơchên hmê kơchâi a hngêi trung hriâm, kơpong cheăng kơmăi kơmok, kơpong ôm hyô, mâu tíu ki mơjiâng pro tê mơdró kế kâ, tơmeăm ôu a troăng kơphô̆ ƀă hên ki ê. Malối, kal tơtrŏng mâu kế kâ ki hiăng tro khu pơkuâ ngăn kơchô tê mơdró châ hlo rôh pro xôi tung pơla hdrối nah.

Vi ƀan hnê ngăn kong pơlê Dak Lak pơkâ thế mâu khu ki tơdjâk mơdêk rơdêi hnoăng cheăng lăm ngăn kơchô tê mơdró, malối cho mâu kế kâ ki rak vế ivá châ chăn, têa tôu ro ƀă pơkeăng pơlât châi tamo dế châ tê tung măng điê̆n tưh. Mâu tơdroăng pro xôi kô tro pơxâu phâk kơtăng ƀă tơbleăng tung mâu um tơvi, rơ’jiu vâ tối tơbleăng ăm kuăn pơlê.