Rôh hôp châ po klêi kơ’nâi mâu rôh tơnêi tơdro ki hlo ôh tá tơniăn a kong pơlê. Chêh xo dêi Viện Vật lý địa cầu, sap ing hâi 4/4/2021 pơxiâm hlo ai mâu rôh tơnêi tơdro a kong pơlê Kon Tum ƀă ki tơdro xiâm cho a tơring Kon Plông. Riân troh mơ’nui khế 4/2025 a kơpong kố hiăng ai 1.000 rôh tơnêi tơdro ƀă tơdroăng ki ôh tá mơhúa tơ’nhiê tơmeăm sap ing kơlo 0 troh kơlo má 1.

Tiô tối dêi mâu khu ki hriăn ‘na khoa hok, tơnêi tơdro a tơring Kon Plông, kong pơlê Kon Tum hlo môi tiah ƀă tơdroăng tơdjuôm dêi tơnêi tơdro mơhnhôk, mê cho tơdro hên tung pơla apoăng, mê ah rế kơdroh, pơtê tiô chôu. Hlo tơdroăng kố, rơtế ƀă krâ ‘măn 11 tíu séa ngăn a Kon Tum, sap ing khế 3/2024  Viện Vật lý địa cầu pơkâ mơ’no mâu troăng hơlâ hbrâ ví tơtro ăm kong pơlê Kon Tum ƀă kơpong ki a chê”.

Ki xiâm troh khế 2/2027 drêng mơgêi đề tài kô pêi pro nhên mâu tơdroăng ki tơdjâk pro chiâng ai tơnêi tơdro mơhnhôk a kơpong tơring Kon Plông, kong pơlê Kon Tum; mơnhên tối ‘na ki tơdjâk pơla tơnêi pêi cheăng ƀă tơdroăng ki kơdĭng tơkŭm têa a mâu long rơchoâ; mơnhên tối ki rơ-iêo dêi tơnêi tơdro ƀă pơlê pơla kong pơlê ƀă chêh pro mâu mơéa hbrâ ví ăm kơpong tơring Kon Plông xuân môi tiah mâu kơpong ki a chê.