A roh hôp tơpui tơno, pôa Tô Lâm, Kăn xiâm pơkuâ hnê ngăn Đảng mơnhên Việt Nam hbrâ cho kông tơdjêp pơla Hungary ƀă kơpong Đông Nam Á ƀă ngăn Hungary cho tíu tơrŭm ki kal vâ thăm tơrŭm cheăng ƀă kơpong Trung Đông Âu ƀă EU.

Péa khu râ kăn pơkuâ môi tuăn pơtối thăm tơrŭm tâ mê nếo loi tơngah kal kí ƀă tơdjêp pơla péa tơnêi têa, péa Đảng pơkuâ, mơdêk tơrŭm cheăng tơpui tơno khu râ kăn xiâm ƀă mâu râ, mơdêk tơrŭm cheăng tung mâu tơdroăng tê mơdró – mơ’no liăn cheăng, khoa hok – kŏng ngê̆, pơhlêh nếo tơmiât pêi rơkê, hnê hriâm hnê mơjiâng tuăn ngôa rơkê...; tối rơdêi gâk kring tơnêi têa – gâk kring tơniăn kal chiâng môi tơdroăng xiâm krá nếo tung tơrŭm cheăng péa tơnêi têa ƀă péa pâ kal mơdêk trâm mâ tơpui tơno pơla kuăn pơlê, kum thăm mơdêk hlê plĕng dêi pó pơla péa hdroâng mơngế.

Péa ngế kăn pơkuâ môi tuăn Việt Nam ƀă Hungary môi tuăn troăng tơleăng tơxup tơbriât ƀă troăng hơniâp lĕm, ing tơdroăng ki nhuô̆m dêi pó tiô luât lâp plâi tơnêi, veăng gum rak hơniâp lĕm, tơniăn, gâk kring a kơpong ƀă tung lâp plâi tơnêi.