Pôa pôa Nguyễn Trọng Nghiã khĕn kơdeăn tơdroăng môi tuăn, hnoăng cheăng pêi dêi péa kong pơlê tung tơdroăng tơrŭm cheăng tiô Pơkâ troh tơrêm kăn ƀô̆, đảng viên, pro môi tuăn tung Đảng ƀô̆ ƀă môi tuăn tung kuăn pơlê.

Malối, péa kong pơlê tơbleăng kơtăng troăng rơhlâ tơ’mot tíu pêi cheăng ra cheăm  ƀă mơjiâng tơdroăng tơkêa bro tơtro mấ môi ăm kong pơlê. Tơdroăng hbrâ hlá mơ-éa chêh ƀă mơngế pêi cheăng ăm hneăng hôp Đảng ƀô̆ rêm râ châ pêi pro tŭm, tơbrê, tối tơdroăng ki pơ’lêh nếo ƀă hnoăng cheăng dêi rêm râ kong pơlê.

Pakĭng mê pôa Nguyễn Trọng Nghiã pơkâ thế pơtối séa ngăn hnê mơhno Tíu xiâm, rak tơniăn tơdroăng kal kí, hbrâ tro tŭm tơdroăng ăm hneăng hôp la ngiâ.