Kong pơlê pơkâ tơkŭm séa ngăn cho mâu tơdroăng tơkêa bro mơ’no liăn cheăng tơnêi têa ối tung pơkâ iâ khế 2021 – 2025, pơkâ pêi hơnăm 2025 xuân môi tiah mâu tơdroăng tơkêa bro ki pơtó.

Vâ pêi pro rĕng tơdroăng mơjiâng pro ƀă tơniăn tơdroăng ki đi đo tung pơkuâ, Viƀan kong pơlê Gia Lai hiăng hnê mơhno mâu khu, kơvâ cheăng, kong pơlê thế xing xoăng nhên hnoăng, tơleăng mâu pá puât ki nếo. Ƀă mâu tơmeăm ki mơjiâng pro ƀă tíu pêi cheăng tro tơdjâk xua tơdroăng rah xo bro lế lĕm khu pêi cheăng tơnêi têa, mâu tíu cheăng kal séa ngăn, pơkâ pơhlêh tơtro vâ tơniăn châ tơƀrê, kơdĭng kơxô̆ liăn, ví tơdroăng ôh tá vâ xúa mâu ngế ki pêi cheăng rơkê.