Xông tơpui a roh hôp, Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng ai tơdjâk tơkŭm hbrâ hô sơ ăm khu Việt Nam troh a kong têa Mih tơpui tơno. Pơtối mê, pơkâ thế Mih pơtê lôi tơdroăng xo hnoăng mơhá ƀă Việt Nam ki vâ iâ 45 hâi vâ ai xiâm kối, tơdroăng, hbrâ pơhlêh tơdroăng.

Tơpui tơno vâ laga ngiâ cho tơdâng tơ’mô tê mơdró krá tơniăn, ai pơxúa ăm tŭm 2 pâ; ai pơxúa ăm mơngế ki rôe xúa 2 pâ, laga ôh tá tơdjâk troh tơkêa lâp plâi tơnêi. Ngế pro xiâm hnê ngăn tơnêi têa tối nhên, tơdroăng ki tơpui tơno tiô tro roh tơpui phôn pơla pôa Tô Lâm, Kăn xiâm pơkuâ hnê ngăn Đảng ƀă Kăn xiâm pơkuâ kong têa Mih; tơbleăng tơdroăng pơtâng tối hbrâ rơnáu tơpui tơno ƀă Mih, djâ kơlo xo hnoăng mơhá rôe tơmeăm khoăng ing kong têa ê vêh a 0% ƀă mâu kế tơmeăm khoăng rôe ing kong têa ê Mih; tơdrêng amê pơkâ thế Mih xúa kơlo hnoăng mơhá môi tiah mê ƀă mâu tơmeăm rôe ing Việt Nam; pơtối mơhnhôk, pro tơ’lêi hlâu rôe tơmeăm khoăng dêi Mih ki Việt Nam kal vâ rôe ƀă mơhnhôk pro tơ’lêi hlâu vâ mâu Kŏng ti Mih mơ’no liăn hên tâ mê nếo a Việt Nam.