Ngoh Nguyễn Thế Tuấn ối a pơlê kong kơdrâm Buôn Ma Thuột, kong pơlê Dak Lak hiăng ai lối 19 hơnăm vê rơxế pơto chơ tơmối kuăn pơlê ôm hyô ing Dak Lak lăm troh a mâu kong pơlê Tơdế tơnêi têa, môi tiah Đà Nẵng, Phú Yên, Khánh Hoà, Bình Định ƀă hên mâu tíu ki ê. Ngoh Tuấn ai tối tiah kố, ing Buôn Ma Thuột lăm troh a Phú Yên tơkâ luâ troăng kân tơnêi têa kơxô̆ 29, cho troăng prôk ki rĕng má môi, xua ga, troăng ki kố maluâ ga kŭn la ôh tá ai văng ki prôk kơ’vĕng kơ’vong. Nốkố, a mâu troăng prôk mê pơla Dak Lak ƀă Phú Yên klêi kơ’nâi tơmot, ôh tá xê tơdroăng ki kŭn.

“Hdrối nah, kơtâu ing Buôn Ma Thuột troh a Phú Yên ton ai 3 chôu 30 phut, nôkố, athế ton châ 5 chôu nếo troh. Xua troăng prôk hiăng tơ’nhê, vâ kơtâu rĕng xuân ôh tá khoh. Kố cho môi to troăng ki kố tê ing Buôn Ma Thuột lăm troh a Tuy Hoà ƀă pơtối vêh nếo. Tơmot péa kong pơlê cho vâ mơnhông, mê troăng prôk tiah mê ga chía pá ha. Tâng vâ tơrŭm ‘na tê mơdró kâ, mơnhông klêi kơ’nâi tơmot ah, mê pơkal athế ‘mâi rơnêu, po rơdâ troăng prôk lăm”.

Jâ Nguyễn Thị Thu Thanh cho môi tung 1.000 ngế kăn ƀô̆, mơngế cheăng a kong pơlê Phú Yên mơni kô lăm ối a pơlê kong kơdrâm Buôn Ma Thuột pêi cheăng klêi kơ’nâi tơmot. Jâ Thu tối ăm ngin ‘nai, tung hneăng lăm pêi cheăng a kong pơlê Dak Lak hôp, tơpui tơno ‘na tơdroăng tơmot, khu kố kơtâu rơxế hrá ‘nâng, xua troăng kŭn, hâ ho, tơ’nhê, athế ví hên mâu rơxế ki kân chơ kơtếo, rơxế ƀen ki chơ kế tơmeăm ƀă tá mâu rơxế  mái dêi hok tro rơtế prôk a drô troăng.

“Ai hên tíu ki tơ’nhê drô troăng prôk, drêng vêh a hngêi châi lâp châ  rơbâp tợbĕn, châi plâ hâi. La ngiâ klêi kơ’nâi tơmot péa kong pơlê kố ah, drêng hiăng pêi cheăng khât, kăn ƀô̆ Phú Yên kô lăm troh a Dak Lak vâ pêi cheăng kô xahpá ‘na troăng prôk lăm. Rêm măng tĭng mơni bu châi a hngêi ai môi hdroh, prôk a kơxo hâi môi ƀă kơxê hâi pơtăm prếo. La troăng prôk ga ‘mêi ó tiah kố, mơni kô prôk ing kơxêi hâi tĭng vâ kơxo má hâi môi nếo teăm pêi cheăng”.

Troăng kân kơxô̆ 29 cho môi tung mâu troăng prôk ki kal tơdjêp pơla pa Hdroh dêi Tơdế Tơnêi têa ƀă Tây Nguyên; prôk hơngế ta troh a tíu tơkăng kong pơla Dak Lak ƀă kong têa Kul ƀă tâi tâng xŏn hơngế ai dâng 293km. Maluâ tiah mê, ƀă troăng ki dó inâi má 4 dêi kong ngo, 2 rơxế tơluâ, tơdế troăng kân rơdâ 5 met tơdế, ki xâ kân péa pâ kĭng ai 7 met tơdế ki hiăng pro ing hên mâu hơnăm hdrối mê hia nah, troăng kân kơxô̆ 29 hiăng tơ’nhiê hên ó khât.

Pôa Trương Công Thái, Phŏ Kăn hnê ngăn Vi ƀan kong pơlê Dak Lak tối ăm ‘pnâi, troăng pơkâ kố dế châ pơkâ thế cho mơ’no liăn vâ ‘mâi rơnêu, po rơdâ troăng prôk ing km31+300 (tơkoh troăng kân kơxô̆ 31, pơlê kong krâm Đông Hoà, kong pơlê Phú Yên troh a tíu tơkoh troăng kân kơxô̆ 14 (km178-062, pơlê kong krâm Buôn Hồ, kong pơlê Dak Lak), xŏn tâi tâng 147 km. Troăng prôk ki kố tiô tối hdrối kô pơtối mơdêk po rơdâ troăng kân râ má 3, ăm phep rơxế kơtâu têi sap ing 60 troh 80 km môi chôu, ai 4 toăng rơxế tơluâ, tơdế troăng kân xâ 20 met tơdế, kơlo liăn ki mơ’no pro lối 10 rơpâu rơtal liăn.

“Ki ahdrối tâ cho athế ‘mâi rơnêu, mơjiâng pro vâ gum ăm tơdroăng prôk lăm tơ’lêi hlâu tung tơdroăng ki gum ăm kăn ƀô̆ lăm pêi cheăng, tiô tơdroăng pơkâ pơxiâm ing hâi lơ 1 khế 9 kố ah. Péa kong pơlê Phú Yên ƀă Dak Lak hiăng chêh pro hlá mơ-éa pơtroh ăm Khu xiâm ngăn ‘na mơjiâng tơmeăm khoăng, Khu xiâm râng liăn ngân hriăn plĕng vâ mơ’no liăn ngân gum ăm péa kong pơlê po rơdâ, ‘mâi rơnêu troăng prôk kố tung pơla rĕng má môi”.

Pôa Tạ Anh Tuấn-Kăn hnê ngăn Vi ƀan kong pơlê Phú Yên ai tối tiah kố, drêng troăng kân kơxô̆ 29 hiăng châ ‘mâi rơnêu, po rơdâ, ing mê ah kô tŏng gum tơ’lêi ăm rêm ngế ƀă mâu rơxế kơtâu, prôk lăm, pơto chơ kế tơmeăm, veăng gum thăm mơdêk pêi cheăng kâ-rêh ối pơlê pơla, klêi kơ’nâi tơmot pơchuâm ah. Maluâ tiah mê, ‘na ton la ngiâ ah, kong pơlê Dak Lak ki nếo athế mơjiâng troăng prôk ki kân, vâ khoh mơjiâng troăng prôk ki xiâm ing pêa mâ hâi lo troh a pêa mâ hâi lu lo a têa kơxĭ, pơtối monhông tiô troăng ki xiâm dêi tơnêi têa. ‘Na tơdroăng kố xuân hiăng châ khu kăn pơkuâ hnê ngăn Đảng uỷ péa kong pơlê rŭm môi tuăn dêi pó ƀă mơni kô châ pơkâ mơ’no tro tiô túa cheăng ki tơrŭm pơla tơchuâm dêi tơnêi têa ƀă krê, dó inâi PPP ing pơla hơnăm 2025 troh a hơnăm 2030, pơhlêh lôi tơdroăng pơkâ hdró dêi Chin phuh vâ pêi a hneăng hơnăm 2030 ah. Pôa Tạ Anh Tuấn ai tối tiah kố:

“Ƀă tơdroăng ki pói rơhêng vâ châ ai dế nôkố klêi kơ’nâi mot pơchuâm péa kong pơlê, xuân môi tiah troăng pơkâ vâ mơnhông châ troh a têa kơxĭ, mê tơdroăng ki mơjiâng pro troăng kân rơdâ cho kal kân khât. Péa kong pơlê Phú Yên prế Dak Lak kơ’nâi ah, cho chiâng kong pơlê Dak Lak ki nếo, kô tối tơbleăng pơtoh ăm Chin phuh Kuôi hô̆i thăm mơdêk tơdroăng mơjiâng hnoăng cheăng vâ pêi pro tung hneăng hơnăm 2025-2030”.

Mơdêk troăng prôk kơxô̆ 29 ƀă mơjiâng troăng kân tơdjêp pơla “kong ƀă têa kơxĭ” mơjiâng chiâng hvêa chêng prôk ki nếo ăm kong pơlê Dak Lak, ôh tá xê to pơklât thế thâ rĕng pêi pro, mê ối mơjiâng ivá cheăng krá tơniăn ton vâ mơnhông tơtêk klêi kơ’nâi tơmot pơchuâm. La ngiâ kô ai troăng prôk kân rơdâ, tơbăng lĕm, krá kâk, châ mơjiâng pro a lâp lu kô po rơdâ tơdroăng tơrŭm tung kơpong, thăm mơdêk ‘na pêi cheăng kâ-rêh ối pơlê pơla krá tơniăn hên tâ ăm kong pơlê Dak Lak ki nếo klêi kơ’nâi tơmot pơchuâm xuân môi tiah a kơpong pêa hdroh tơdế tơnêi têa ƀă  Tây Nguyên.