Kơxo lơ 12/5, a pơlê kong kơdrâm Gia Nghĩa, Khu xiâm ngăn Kŏng an tơrŭm ƀă Vi ƀan hnê ngăn kong pơlê Dak Nông rơtế ƀă mâu tíu tŏng gum tơkŭm po leh tơbleăng pro, têa tah hngêi pơtân, hngêi xi kơchoh; tơdrêng amê hlối tơdah xo liăn ƀă pơcháu hngêi túa vâ pro ƀối a kong pơlê. Khu xiâm ngăn Kŏng an hiăng mơhnhôk tơlo ƀă diâp 30 rơtal liăn vâ gum pro 500 toăng hngêi ăm rơpŏng kơtiê, vâ chê kơtiê ƀă rơpŏng châ tơnêi têa gum xơpá ‘na hngêi ối a kong pơlê Dak Nông.

A rôh Leh, Trung tươ̆ng Phạm Thế Tùng, Phŏ ngế xiâm ngăn Kŏng an rơkâu mâu rơpŏng ki châ tơdah xo hngêi, tơdrêng amê hlối pơtroh rơkong mơnê troh mâu khu ki tŏng gum, mâu khu râ, kơvâ cheăng a kong pơlê Dak Nông hiăng rơtế prôk, tơrŭm rơtế ƀă Khu xiâm ngăn Kŏng an tung hnoăng cheăng têa tah hngêi ối pơtân, hngêi tơ’nhiê xi kơchoh a kong pơlê.

Tiô pơkâ, kong pơlê Dak Nông kô têa tah tâi tâng 1.755 toăng hngêi xi kơchoh, gum rơpŏng kơtiê, vâ chê kơtiê, rơpŏng châ tơnêi têa gum ƀă kuăn pơlê hdroâng kuăn ngo tung lâp kong pơlê. Riân troh nôkố, kong pơlê hiăng pro 75% tơdroăng cheăng ƀă tiô tối hdrối kô têa tah klêi hngêi pơtân, xi kơchoh hdrối hâi 30/8/2025.