Pôa Tô Lâm, Kăn xiâm pơkuâ hnê ngăn Đảng ƀă pôa Aleksandr Turchin, Ngế pro xiâm hnê ngăn kong têa Belarus vâ môi tuăn tơdroăng tơrŭm péa tơnêi têa dế troh rôh tơ’lêi hlâu, tối péa tơnêi têa kal pơtối rak vế pêi pro ki rơdêi tơdroăng hmâ pêi pro ing ton nah vâ po rơdâ tơrŭm cheăng ki khât, tơƀrê.

Péa pâ kô mơjiâng môi tơdroăng pêi pro vâ tơbleăng tơrŭm cheăng hlối mơnhông, mơdêk tơpui tơno râ kân tâ ƀă rêm râ, mơdêk tơrŭm cheăng kâ, tê mơdró tơxâng ƀă tơrŭm cheăng, mơdêk tơrŭm cheăng ‘na kơmăi kơmok, tung mê, ai pro ô tô ƀă rơxế  pơchoh chêk, tơrŭm cheăng khoa hok kơmăi kơmok, hnê hriâm hnê mơjiâng tuăn ngôa rơkê, túa lĕm tro, ôm hyô, trâm tơpui tơno ƀă kuăn pơlê, mơdêk trâm tơpui tơno ƀă rơxông nếo vâ rak vêa, pơtối tơrŭm tơrôa tiô hmâ ing nah.

Tơpui ‘na mâu tơdroăng tung kơpong ƀă lâp plâi tơnêi ki péa pâ rơtế vâ ‘nâi plĕng, péa pâ tối kô pơtối tơrŭm krá a mâu hneăng hôp tung kơpong ƀă lâp plâi tơnêi, rơtế môi tuăn ƀă mâu luât pơkâ dêi luât lâp plâi tơnêi, ‘no hnoăng a tơdroăng pơtối rak hơniâp lĕm tơniăn, tơrŭm ƀă mơnhông a kơpong ƀă tung lâp plâi tơnêi.