Thôn Hàng Lang, cheăm Gung Reh, tơring Di Linh, kong pơlê Lâm Đồng ai hên kuăn pơlê kuăn ngo. Mâu hơnăm hdrối nah, tơdroăng tăng  ƀă tơ’mot đảng viên ing kuăn pơlê pêi cheăng kơhnâ rơkê đi đo châ mâu kăn Đảng, chi ƀô̆ thôn tơmâng khât. Krâ pơlê K’Keo, Ngế hnê ngăn Chi ƀô̆ thôn Hàng Lang ăm ‘nâi, kơnôm tơmâng khât tơdroăng ăm lăm hriâm tơ’nôm, tăng tơ’mot mâu ngế mot đảng viên teăng ‘mot tiô kơxô̆ hên, 100% ngế đảng viên tung chi ƀô̆, malối mâu đảng viên đi đo châ tơmâng khât, pơtối rak tơdroăng ki lĕm tro djâ troăng, pêi a hdrối tung mơnhông pêi chiâk ƀă tơdroăng rêh ối.   

“Hdrối nah, chi ƀô̆ bú ai 8 đảng viên, troh nôkố hiăng tơ’mot 13 đảng viên, tung mê, ai hên cho đảng viên kuăn ngo. Tung hơnăm kố, chi ƀô̆ pơtối séa ngăn ƀă rah xo 2 ngế kuăn pơlê hdroâng kuăn ngo ki pêi cheăng kơhnâ rơkê lăm ăm hriâm lâm vâ mot Đảng, ƀă drêng hiăng klêi hriâm mê chi ƀô̆ kô séa ngăn vâ tơ’mot. Vâ tối, Chi ƀô̆ ngăn nhoăm khât troh kuăn pơlê ki pêi cheăng kơhnâ rơkê, mâu ngế ki vâ mơ-eăm, hâk vâ, mơ-eăm pêi khât ƀă Đảng mê ngin rah ăm mot Đảng. Klêi tơ’mot, rêm ngế đảng viên ki kơhnâ mê, đi đo djâ troăng lĕm ahdrối tung tŭm tơdroăng, pro ngế prôk hdrối vâ kuăn pơlê pêi ƀối”.

Môi tiah kơpong kuăn ngo cheăm Dà Nhim, tơring Lạc Dương, kong pơlê Lâm Đồng xuan pêi tro mâu tơdroăng tăng rah ăm hriâm, pro tơ’lêi ăm hên ngế kuăn pơlê ki pêi cheăng kơhnâ châ mot Đảng. Tung lối 120 ngế đảng viên, rêh ối a 10 chi ƀô̆ dêi cheăm Dà Nhim mê lối tơdế cho mâu kuăn ngo K’Ho. Nâ Cil Pam Ka Duyên, đảng viên hơnăm ối nếo Chi ƀô̆ thôn Dà Tro, cheăm Dà Nhim tối, ai ngế ki khât, ai tơdroăng pêi khât mê tơdroăng hnê tối, mơhnhôk mâu troăng hơlâ, luât pơkâ dêi Đảng ƀă luât  Tơnêi tê nếo pro pơxúa tro, ƀă kuăn pơlê tung kong pơlê nếo xúa pêi ƀối.

Xua mê, vâ kuăn pơlê loi ƀă khên pơ'lêh tuăn tơmiêt pêi cheăng kâ, pơ’lêh hdrê pêt, pêt mâu hdrê loăng ki nếo tung pêi chiâk, mơdêk tơ’mot liăn xua rêm ngế đảng viên đi đo cho ngế ki djâ troăng a hdrối. 

“Klêi hiăng chiâng đảng viên, hiăng ai tơ’nôm rôh hriâm vâ hlê plĕng nhên mâu troăng hơlâ dêi Đảng, luât tơnêi têa. Ing mê, a nếo pêi tro tơdroăng cheăng, tơ’nôm tơdroăng cheăng châ chi ƀô̆ pơcháu. A hiăng kum kuăn pơlê tơná hên tâ, cho mơhnhôk kuăn pơlê  pơ’lêh hdrê pêt, mơ-eăm pêt tơ’nôm hdrê loăng plâi iâ khế vâ tăng tơ’nôm liăn pê lo, mơnhông cheăng kâ rơpŏng hngêi. Nôkố tơdroăng rêh ối dêi kuăn pơlê kuăn ngo a kố hiăng kơdroh hên ki xơpá tâng vâ pơchông ƀă hdrối nah”.  

Tiô pôa Cil Ha Poh, Kăn hnê ngăn Đảng ủy cheăm Dà Long, tơring Dam Rông, kong pơlê Lâm Đồng, vâ tơniăn pêi tro tơdroăng tơ’mot mơngế mot đảng viên, malối cho mâu đảng viên hơnăm ối nếo kơpong kuăn ngo, tơdroăng tăng mơngế tung kuăn pơlê, ăm lăm hriâm ƀă mâu kuăn pơlê ki hiăng rah tung mâu khu tơrŭm cheăng kal kí pơlê pơla, a pơlê a mâu tíu pêi cheăng cho hnoăng cheăng pêi xiâm. Ing mê, sap apoăng hneăng troh nôkố, cheăm Dà Long hiăng tơ’mot  châ 17 ngế đảng viên, tung mê ai 11 ngế đảng viên hriâm troh đăi hok ƀă 5 ngế đảng viên hriâm trung cấp.

Kố cho mâu đảng viên hơnăm ối nếo hdroâng kuăn ngo châ ngăn cho khu ngế ki pơtối tung tơdroăng tăng tơ’mot mơngế mot Đảng a hneăng la ngiâ. Pôa Cil Ha Poh, ăm ‘nâi:   

“Ing tơdroăng hnê mơhno dêi râ kơpêng mê Đảng ủy cheăm hiăng pêi kơtăng tung tơdroăng tăng mơngế, xoăng ăm mâu đảng ủy viên pơkuâ mâu chi ƀô̆, rơtế ƀă mâu chi ủy cho chi ƀô̆ veăng tăng ngăn, ăm hriâm tơ’nôm, ăm hriâm pât ƀă pêi tro tơdroăng cheăng mâu chi ƀô̆, tơdrêng ƀă mâu chi ủy chi ƀô̆ séa ngăn, hriâm tơ’nôm, hriâm ƀă pêi pro tơdroăng ‘na tuăn mơno. Tơmâng khât troh kuăn pơlê ki kơhnâ, cho mâu hơnăm ối nếo, mâu rơtăm ki hiăng mot pro mố đô̆i, mâu hơnăm ối nếo ki  kơhnâ rơkê tung pêi cheăng ‘nâi mơnhông cheăng kâ dêi rơpŏng hngêi, mâu hơnăm ối nếo ki veăng tơ’noăng pêi tơdroăng cheăng pâ nhoăm tơnêi têa... Ing mê, ai xiâm vâ rah pro tơ’lêi hlâu ăm lăm hriâm lâm ‘na Đảng. Klêi hriâm hiăng hlê ‘na Đảng, mâu đảng viên tung chi ƀô̆ pơtối veăng gum, hnê hriâm pât tơná vâ ăm vâi hlê tro, pêi tro drêng mot tung Đảng”.

Mâu đảng viên hơnăm ối nếo tung kơpong hdroâng kuăn ngo dêi kong pơlê Lâm Đồng tối hnoăng cheăng pêi ahdrối, djâ troăng lĕm a hdrối, ‘nâi kơdôu mơ-eăm mơnhông tung pêi cheăng kâ ƀă rêh ối. Tơdroăng kố mơhno troăng prôk ki tro ló, krá kak tung tơdroăng mơjiâng Đảng rơtế ƀă mơnhông kơpong kuăn ngo tung pơla nôkố. Kố châ ngăn cho tơdroăng cheăng pêi ki tro ki kal, cho troăng hơlâ vâ Lâm Đồng rơtế ‘mâi mơnhông cheăng kal kí a pơlê cheăm, veăng mơhnhôk mơnhông cheăng kâ-rêh ối, rak tơniăn ƀă mơdêk khu tơrŭm môi tuăn tung tâi tâng hdroâng mơngế a pơlê cheăm tơring tung kong pơlê.