Phá ƀă pa kong châ kŭn môi tiah hok tro râ má môi ƀă châ chăn ôh tá lĕm môi tiah vâi ki ê, Chương Đình Phúc (kot mâ hơnăm 2005), sinh viên hơnăm má 2, lâm Sư phạm tiếng Anh, Khoa ngoại ngữ, hngêi trung Đăi hok Tây Nguyên djâ ăm mơngế châ trâm hlo tơdroăng ki lĕm tro xua drêng tơpui tơno pro ăm mơngế ki ê hâk vâ ƀă tơdroăng tơkâ hluâ rêh ối pá puât cho rơdêi.

Phúc tro chó 2 kơpeăng kŏng sap ing pơxiâm kot mâ, ivá ôh tá pá hro, drêng ối kŭn xuân ôh tá mơhúa xua nôu pâ tơlôi dêi pó sap ing ối kŭn xua mê chiâng kơmlâm. Ƀă tơdroăng veăng kum ing mâu ngế rơtâ tá, Phúc hiăng tơkâ hluâ tơdroăng ki kơxiâp, mơ-eăm hriâm tâp ƀă veăng mâu tơdroăng cheăng đoân, hô̆i, chiâng um méa ki rơkê tung hên hnoăng pêi a râ phôh thong ƀă đăi hok.

Phúc xuân cho môi tung péa ngế ki kơhnâ rơkê hơnăm ối nếo tung tơdroăng ‘’Eăng troh lâp lu ivá dêi ihiâm mơno Việt’’ hơnăm 2024.

Chương Đình Phúc tối, 5 tơdroăng Pôa Hồ hnê châ hriâm pâ ing ối kŭn chiâng ‘’Tơdroăng ki mơhno troăng’’ vâ ngoh mơ-eăm hriâm tâp ƀă mơ-eăm rêm hâi. Mơhé ai mâu tơdroăng pá puât ‘na châ chăn, ngoh xuân pói vâ chiâng ngế ki tơpui djâ tơdroăng rơkê ƀă cho môi thái cô chiâng pơtroh tơdroăng ki hâk vâ pêi ăm hok tro.

‘’Á pói vâ drêng lo mơgêi hngêi trung mê á xuân hriâm Pôa Hồ, mê cho drêng á hriâm châ ki klâi mê á kô hnê tối ăm ngế ki ê. Á pói vâ kô cho môi ngế thái ôh tá xê hnê ăm mâu pú hmâ ‘na tơdroăng ki rơkê mê ối cho môi tíu ki hgiân ‘na hiâm mơno vâ mâu pú hmâ ai mâu tơdroăng pá puât, mâu tơdroăng ki tơmiât ôh tá tro vâ ai tíu ki hgiên, vâ ôh tá tơkâ hluâ mâu tơdroăng rêh ối pá puât mê môi ngế xêh môi tiah á o hiăng tơkâ hluâ drêng ối kŭn nah’’.

Xuân pâ rơkong hnê dêi Pôa Hồ “a lâi kal droh rơtăm ai mâ, tơdroăng klâi pá ai droh rơtăm’’, ngoh Trần Tiến (kot mâ hơnăm 1992), ngế ki rơkê kơbong Pơkuâ Xo – Phĭu mơ-éa, Theh, Ƀaoh hiêm pơlê pơla kong pơlê Dak Lak hiăng tơbleăng, tơkŭm po mâu tơdroăng droh rơtăm tơmiât troh mâu tơring tung kong pơlê. Ngoh hên xôh tơdjêp tơkŭm po tơdroăng pêi kum rak vế, troh lâp lu mâu ki kơnâ khôi túa lĕm dêi mơngế hdroâng kuăn ngo, môi tiah rơnêu, mơgrúa lĕm têa kơneăng, mơdêk hlê plĕng rak vế kong prâi ăm kuăn pơlê; diâp kơxuô tơmeăm, tŏng gum kơxô̆ liăn hnê tôu chêng ăm pơlê kơpong tơkăng kong.

Rơtế amê, ngoh Tiến hiăng ti tăng, mơdêk xúa pơhlêh kŏng ngê̆ tung pêi pro hnoăng cheăng, ai hên troăng pêi nếo, troăng pêi  tơmiât pêi rơkê vâ tŏng gum kuăn pơlê cai đăt, xúa phân mêm mơ’no tơdrêng tung hyôh măng, pro tơ’lêi hlâu tung tơdroăng pro hlá mơ-éa ƀă xúa mâu tơdroăng pro mơ-éa ‘na ƀaoh hiêm pơlê pơla. Ngoh Trần Tiến tối:

‘’Á cho đảng viên hơnăm ối nếo, xuân châ chi ƀô̆ gum tơ’lêi hlâu đi đo tơdah mâu chuyên đê hôp, ai tơdroăng vâ ti tăng plĕng trâu hơngế tâ mâu chuyên đê inhên dêi tơdroăng hriâm tâp ƀă pêi tiô Pôa Hồ. Á đi đo mơ-eăm tâi ivá tơná xua tơdroăng pêi cheăng tơdjuôm, tung pêi pro hnoăng cheăng mê á hriâm tâp Pôa Hồ hên má môi a tơdroăng ki hriâm xêh, đi đo hriâm vâ mơdêk ki rơkê ăm dêi tơná’’.

Ƀă nâ Nguyễn Thùy Trang, kot mâ hơnăm 1992, Kăn pơkuâ hnê ngăn Đoân Droh rơtăm bêng Ea Tam, pơlê kong kơdrâm Ƀuôn Ma Thuột, mơhé a hơnăm ki lâi, pêi cheăng ki lâi, nâ xuân hlê plĕng nhên, hnoăng dêi ngế kăn ƀô̆. 23 hơnăm hiăng pro Phŏ kăn hnê ngăn Mât trâ̆n Tơnêi têa bêng ối nếo má môi Dak Lak, nâ Trang hiăng hbrâ tơdjêp hriâm tâp ƀă pêi tiô troăng tơdjâ, hiâm mơno Hồ Chí Minh tung hnoăng cheăng.

Sap ing troh pêi cheăng Đoân Droh rơtăm, nâ hiăng mơhnhôk mơjiâng 7 tơmeăm droh rơtăm, tơkŭm po hên tơdroăng kum rêh ối pơlê pơla, thăm veăng mơhnhôk droh rơtăm mot pro mô đô̆i, tŏng gum droh rơtăm pơxiâm tăng cheăng pêi, tơdjêp droh rơtăm veăng mâu tơdroăng rak ‘măn ƀă rak vế khôi túa lĕm vâi krâ nah mâu hdroâng kuăn ngo. Ing mê, mơjiâng tơdroăng ki tơdjêp, mơnhông hnoăng dêi droh rơtăm a tíu pêi cheăng. Nâ Nguyễn Thùy Trang tối ăm ‘nâi:

‘’Ing mâu roh mơhnhôk xuân môi tiah ti tăng plĕng ‘na Pôa Hồ mê á hriâm tâp châ a Pôa Hồ mâu hiâm mơno lĕm, kơhnâ, chiu pá ƀă thế đi đo pôu râng hnoăng cheăng dêi châ tơná tung pêi pro hnoăng cheăng châ pơcháu dêi mâu râ. Tơdrăng pêi cheăng ƀă tiô tro pơkâ dêi khu tơrŭm cheăng vâ mơjiâng tơrŭm cheăng achê má môi pơla Đảng ƀă kuăn pơlê ƀă tung kăn ƀô̆ ƀă đoân viên, droh rơtăm’’.

Ƀă mâu tơdroăng pêi ki nhên, pơxúa, tơtro ƀă tíu pêi cheăng ƀă hriâm tâp, rơxông ối nếo kong pơlê Dak Lak hiăng ‘’Hriâm tâp ƀă pêi tiô troăng tơdjâ hiâm mơno Pôa Hồ Chí Minh’’ ro hơniâp tiah hlo ƀă mâ. Mâu ngế ki kơhnâ rơkê tung roh mơhnhôk kố hiăng mơjiâng ivá troh lâp lu ó rơdêi tung đoân viên, droh rơtăm, veăng kum ki kal tung tơdroăng kêi đeăng hnoăng pêi cheăng, hriâm tâp a mâu kơ koan, tíu cheăng, hngêi trung hriâm a Dak Lak.