Mơgêi rôh hôp, pôa Tô Lâm, Kăn xiâm pơkuâ hnê ngăn Đảng tối, tơdroăng pơkâ ‘na tơrŭm khu lêng kong pơlê iâ, tơkŭm, rơdêi” pêi pro châ tơdroăng pơkâ thế hnoăng cheăng tung tơdroăng nôkố, tơtro ƀă mâu tơdroăng cheăng tung la ngiâ ‘na lêng, gâk kring ƀă troăng hơlâ cheăng lêng. Malối, hiăng rak vế túa pơkâ Đảng kăn pơkuâ Lêng kuăn pơlê Việt Nam khât, tơdrêng ‘na rêm kơvâ ki ai mâ đi đo cho Khu xiâm pơkuâ tơdroăng kal kí, Khu pơkuâ ngăn Đảng; pơtó túa tơmiât ƀă tơkŭm Khu lêng kuăn pơlê Việt Nam hiăng tối tung mâu tơdroăng pơkâ, mơgêi dêi Đảng; rak vế khu lêng pêi pro cho khu lêng ki xiâm rak vế krá rơdêi Tơnêi rêa Việt Nam xah hô̆i chuh ngiah.

Tung tơdroăng ki pêi pro mâu pơkâ, mơgêi dêi Khu xiâm pơkuâ tơdroăng kal kí, Kăn xiâm pơkuâ hnê ngăn cheăng Đảng pơkâ thế, pơtối xing xoăng mâu khu tơrŭm cheăng lêng kong pơlê, mố đô̆i gâk tơkăng kong tiô troăng pơkâ dêi Đảng, Tơnêi têa; rak tơniăn “tơkŭm, tơbrê, rơdêi” xêt kơdroh tíu xiâm a dế, cho tơdroăng ki xiâm tung mơjiâng ƀă pêi pro tiô troăng hơlâ cheăng lêng gâk kring kuăn pơlê, veăng gum kuăn pơlê ƀă rak vế krá rơdêi hnoăng pơkuâ gâk kring tơkăng kong tơnêi têa.