Kông Rạch Miễu 2 (pro a têa kroăng Tiền) tơdjêp kong pơlê Tiền Giang ƀă Bến Tre ai tâi tâng kơlo liăn mơ’no liăn lối 6.800 rơtal liăn dế thâ kêi đeăng vâ djâ xúa. Tiah mê Bến Tre - Tiền Giang hiăng ai 2 to kông ‘’tơdjêp pơla mâu kĭng ki hơniâp ro’’, tơleăng tơdroăng ‘’kreăng rơxế’’ hên hơnăm hiăng hluâ. Pôa Trần Văn Bon, Kăn pơkuâ Khu mơjiâng tơmeăm kong pơlê Tiền Giang phiu ro tối:

‘’Kông Rạch Miễu kố hiăng kêi đeăng lối 80%, tơdroăng tơkêa bro kố kêi đeăng hrá má môi cho hâi lơ 2/9/2025. Kố cho tơdroăng ki kal ai kơnâ kal khât ăm tơdroăng mơnhông cheăng kâ – rêh ối pơlê pơla 2 kong pơlê Tiền Giang ƀă Bến Tre ƀă mâu kong pơlê tơdế dêi kơpong’’.

Ƀă hên kơxô̆ liăn ing tơnêi têa, kong pơlê, tơdâng rêm hơnăm, kong pơlê Tiền Giang tơkŭm kơxô̆ liăn mơ’no cheăng lối 800 rơtal liăn mơjiâng troăng klông. Mâu tơdroăng tơkêa bro po rơdâ, pro lĕm mâu troăng kân ki xiâm hiăng kêi đeăng, tơdroăng prôk lăm dêi kuăn pơlê tơ’lêi hlâu, rơxế ô tô prôk troh mâu cheăm, kơtâu. Pôa Ngô Tấn Lâm, a cheăm Tam Bình, tơring Cai Lậy, kong pơlê Tiền Giang tối:

‘’Á rêh ối 2 rơxông mê hlo rơxông kố niân ‘nâng, troăng klông thôn pơlê hiăng pro tâi tâng. Hngêi ki lâi xuân ai rơxế hon đa 2 – 3 toăng, kuăn pơlê kro mơdrŏng. Kông troăng kân nôkố prôk troh a dêi pó, kơpong Ngũ Hiệp nôkố pro kông niân ‘nâng, kuăn pơlê thăm kro mơdrŏng. Mâu hơnăm hdrối nah, kuăn pơlê mơjiâng pro hngêi trá tơnêi, laga nôkố mơjiâng pro hngêi ƀă ƀê tong, ai ngế mơjiâng pro hngêi 3 – 5 râ. Tíu tê tơmeăm pêi lo ing chiâk deăng kơnôm ai kông tơ’lêi hlâu, cho hlâu’’.

Bến Tre nah châ ngăn cho ‘’rơlố’’ xua chiâng ing 3 to chuăn, têa kroăng, hno, thông têa tơvâ tơvŭng. Troh nôkố, mâu tơno plong hluâ têa kroăng hiăng pơhlêh ƀă mâu kông ƀê tong krá kâk. Hơnăm nah, Bến Tre cho kong pơlê apoăng dêi kơpong Tơbăng Kroăng Cửu Long pơxiâm pêi pro tơdroăng tơkêa bro mơjiâng troăng kân kĭng têa kơxĭ. Pôa Nguyễn Trúc Sơn, Phŏ Kăn hnê ngăn Vi ƀan kong pơlê Bến Tre tối ăm ‘nâi:

‘’Troăng kân kĭng têa kơxĭ, hơnăm 2024 ngin hiăng pơxiâm pro môi kơpong ƀă môi to kông. Hơnăm 2025 ngin pơtối mơjiâng troăng kân kĭng têa kơxĭ kố, ahdrối tơdjêp ƀă kong pơlê Tiền Giang ƀă kong pơlê Trà Vinh, cho 2 tíu ai tơmeăm kân ki ngin thế mơ’no ivá pêi pro tơmeăm kố tung hơnăm 2025, ƀă kơxô̆ liăn hiăng mơ’no ăm hneăng hơnăm 2024 – 2025’’.

Troh nôkố, kong pơlê Sóc Trăng ai 17 troăng kân chiâng troăng kân tơdjêp dêi pó, kum mơnhông cheăng kâ – rêh ối pơlê pơla, ƀă mơhnhôk mơ’no liăn cheăng mâu tơdroăng tơkêa bro tung kong pơlê. Ki rơhêng vâ tối, tiô tối hdrối troh lơ 30/4 hơnăm kố, kông Đại Ngãi 2 ƀă troăng ki tơdjêp 2 tơring Long Phú ƀă tơring Cù Lao Dung (Sóc Trăng) kô kêi đeăng, mơjiâng tơdroăng ki tơdjêp troăng klông tơ’lêi hlâu pơla mâu kong pơlê tơbeăng peăng Hdroh tơnêi têa ƀă dêi pó ƀă Pơlê kong kân Hồ Chí Minh.

Pôa Nguyên Thanh Chiều, Kăn pơkuâ Khu tơrŭm pêi chiâk deăng An Phát a cheăm An Thạnh 1, Cù Lao Dung, Sóc Trăng, tối:

‘’Hdrối nah Cù Lao Dung tro kơdât têa kroăng, pá vâ prôk lăm troh dêi pó, tâng pin tơkâ têa kroăng xuân pá puât. Kông Đại Ngãi kêi đeăng, prôk lăm mê Khu tơrŭm cheăng ngin kô mơnhông tâ mê nếo, ai ivá tơbriât hên tâ ƀă mâu tơmeăm plâi kâ, ki rơhêng vâ tối cho plâi nong. Ngin dế ai pơkâ po tíu pro plâi nong têng rơmuăn ƀă mơnhông ôm hyô kong kế, loăng nhâ’’.

Mâu kong pơlê ki ê, môi tiah: An Giang, Đồng Tháp, Cà Mau, Vĩnh Long troăng klông xuân châ mơ’no liăn pêi pro kêi đeăng, ‘’pro ‘nâng ‘nâi’’ kơtăn mâu kong pơlê, kơdroh chôu prôk lăm dêi kuăn pơlê.

Tiô Khu xiâm mơjiâng tơmeăm, nôkố kơpong tơbăng Kroăng Cửu Long hiăng ƀă dế pêi pro 9 tơdroăng tơkêa bro troăng klông ki kal tơnêi têa ƀă tâi tâng kơxô̆ liăn mơ’no cheăng dâng 106 rơpâu rơtal liăn. Kô chiâng vâ mơnhên tá hâi la lâi hngêi trăng, troăng klông kơpong tơbăng kroăng Cửu Long châ mơ’no liăn hên môi tiah nôkố. Tiô pơkâ pêi troh hơnăm 2030, Tơbăng Kroăng Cửu Long ai dâng 1.200 km troăng kân ăm phêp rơxế kơtâu têi ƀă 3 troăng tiô troăng Peăng Kơnhŏng – Peăng hdroh ƀă Peăng mâ hâi lo – Peăng mâ hâi lu. Troh nôkố, kơpong kố xuân hiăng ai pơkâ pêi klêi tơraih tơƀai, troăng têa tung kơpong.

Drêng ai tơdroăng ai khât nôkố hiăng mơnhên, troăng klông prôk hdrối, cheăng kâ mơnhông tiô. Hơnăm hiăng hluâ, tơtêk cheăng kâ dêi kơpong troăng Cửu Long châ 7,3%, hên tâ kơlo tơdâng tơdjuôm dêi lâp tơnêi têa. Pêi lo liăn rêm ko mơngế tung kơpong châ 80,7 rơtuh liăn hơnăm 2024.

Ƀă mâu tơmeăm, tơdroăng tơkêa bro troăng klông châ mơjiâng ƀă thâ kêi đeăng tung mâu hơnăm la ngiâ cho tơdroăng ki kal kum kơpong tơnêi tơchên têa kroăng ‘’Mơ-eăm xêh’’ mơnhông, krá tơniăn mot tung chal nếo dêi tơnêi têa.