Tíu koh tơbâ Pơtáu Hùng châ mơjiâng a ngo xŏn, ối tung thôn 6, cheăm tơkăng kong Dak Buk So, tơring Tuy Đức, kong pơlê Dak Nông. Hdrối hâi Tơbâ Jâ pôa nah, kuăn pơlê tơkŭm rơnuâ tíu koh tơbâ: ngế ki ‘nâ pik puâ rơbông a mơnât, ngế ki ‘nâ kơpuih văng plông, ngế ki ‘nâ pro kơƀăng tăng lế lĕm a toăng hngêi tơdah tơmối nếo mơjiâng. Pôa Chử Anh Chương, ối tung Khu ki pơkuâ tíu koh tơbâ, tối ăm ‘nâi, hâi lơ 30/3 âm lĭt cho hâi phiu ro kân a kơpong tơkăng kong kố ƀă mâu ngế hơngế pơlê xiâm Phú Thọ:

‘’Tâi tâng mâu ngế pơrá tơmiât ‘na xiâm kối, hlê plĕng dêi vâi krâ kuăn pơlê pin cho: ‘Mơhé prôk pêi cheăng a tíu ki lâi, pâ hâi tơbâ jâ pôa hâi 10 khế 3 âm lĭt mê vêh’’. Vâi krâ kuăn pơlê kơbố xuân pơrá tơmiât môi tiah mê. Ngin mơjiâng hngêi koh tơbâ vâ mot roh Tơbâ jâ pôa 10/3 mê po tơbâ, ƀă mâu roh mơ’nui hơnăm mê tơkŭm po trâm mâ Khu ki ai pơlê xiâm môi pơlê Phú Thọ, tối ăm dêi pó túa ki rơkê pêi kâ, kih thuât pêi chiâk deăng, păn mơnăn mơnôa lơ tê kế tơmeăm’’.

Tíu koh tơbâ Pơtáu Hùng a thôn 6, cheăm Dak Buk So châ mơjiâng tung kơdrum kân rơdâ dâng 2 rơpâu mêt karê. Tung mê, tíu koh tơbâ châ mơjiâng tiô hngêi pơtáu ối ton nah ai ƀăng deăng dâng 40 met karê. Tung mê, tíu koh tơbâ châ mơjiâng ai 7 râ, ƀă plông kân rơdâ rơtâ tá. Tíu ‘măn tơmeăm xối pleăng krip krih, ai tăng ‘nân pơtáu pro ƀă mêa ki bro ƀă tơmeăm ki vâ tơbâ dêi Pơtáu Hùng. Pakĭng mê, vâi krâ kuăn pơlê xuân mơjiâng mâu hngêi tơdah tơmối kân lĕm rơdâ, plông xah tơ’noăng ivá, tíu mơđah tơbleăng rơhdruê xuăng...

Pôa Nguyễn Xuân Phúc, ối a thôn 8, cheăm Dak Buk So, tơring Tuy Đức, tối ăm ‘nâi, sap ing mơjiâng pro kêi (hơnăm 2018), tíu koh xối tơbâ hiăng chiâng tíu pêi pro mâu tơdroăng tơmiât troh xiâm rêi, rak vế ƀă mơnhông khôi túa vâi krâ nah:

"Mot tung kố hơngế ing pơlê xiâm, vâi krâ kuăn pơlê ngin mơjiâng Khu ki rêh ối a môi pơlê xiâm Phú Thọ, klêi mê veăng tơlo kơxô̆ liăn rôe tơnêi ƀă mơjiâng tíu koh tơbâ vâ tơbâ mâu Pơtáu Hùng ƀă cho tíu tơkŭm po hôp pơlê pơla. Pin rak khôi túa kăch măng dêi jâ pôa, hnê hriâm kuăn cháu thế hlê plĕng tơmiât troh xiâm rêi, ai hnoăng ƀă Tơnêi têa, thăm veăng mơjiâng pơlê xiâm má péa kro mơdrŏng, ó rơdêi’’.

A kơpong tơkăng kong Dak Buk So, tíu xiâm tơring Tuy Đức, Tíu koh tơbâ Pơtáu Hùng cho tíu trâm mâ, tơdjêp pơlê pơla. Nâ Thị Chí (hdroâng kuăn ngo M’Nông) ối a ƀon Bu Ndrung, cheăm Dak Buk So tối ăm ‘nâi, tiô khôp Pâ Xeăng, laga rêm roh Tơbâ Jâ Pôa, pơrá troh têk nhang tơbâ mâu Pơtáu Hùng a tíu koh tơbâ ƀă trâm mâ rơtế rêm ngế.

"Mâu hâi leh têt, Tơbâ hâi hlâ dêi Pơtáu Hùng mê á pơrá troh têk nhang tơbâ khu Pơtáu Hùng. Kơnôm ai tíu koh tơbâ, á ƀă vâi krâ kuăn pơlê tung pơlê châ tơdjêp, trâm mâ mơhno khôi túa lĕm tro, rơhdruê xuăng, tơ’noăng ivá ƀă vâi krâ kuăn pơlê xiâm a kong pơlê Phú Thọ mot a kố mơjiâng cheăng pêi ƀă mâu kơpong pơlê xiâm ki ê. Rêm ngế tơdjuôm rêh ối lĕm ƀă dêi pó’’.

Pôa Ngô Văn Thương, Kăn hnê ngăn Vi ƀan cheăm Dak Buk So, tối, sap ing ai tíu koh xối tơbâ, hâi Tơbâ Pơtáu Hùng hiăng chiâng hâi leh dêi tíu tơkăng kong:

 ‘’Roh tơbâ hâi Pơtáu Hùng hlâ, hên vâi krâ kuăn pơlê tung kong pơlê, tơring, cheăm ƀă khu râ kăn pơkuâ hnê ngăn Đảng, khu râ kăn pơkuâ pơrá troh têk nhang mâu Pơtáu Hùng. Kố cho khôi túa lĕm tro dêi kuăn pơlê a cheăm, ki rơhêng vâ tối cho vâi krâ kuăn pơlê mơngế Phú Thọ rêh ối tung cheăm. Ngin cho cheăm tơkăng kong, ai kơdrâm hên khu hdroâng mơngế rêh ối, ing kố veăng gum mơjiâng tơdroăng tơrŭm tâi tâng hdroâng mơngế’’.

Tơdroăng mơjiâng tíu koh xối tơbâ Pơtáu Hùng hlâ dêi vâi krâ kuăn pơlê pơlê xiâm a Tơnêi jâ pôa apoăng nah a Dak Buk So ôh tá xê to gum rak tơdroăng ki loi tĭng, mê ối mơnhông khôi túa kăch măng, thăm pro krá tơniăn tơdroăng tơrŭm môi tuăn pơla mâu hdroâng kuăn ngo a tơkăng kong Tây Nguyên. Tíu koh tơbâ hiăng chiâng tíu pơtroh tơdroăng tuăn pâ ‘’Pâ mâu ngế ai hnoăng tơnêi têa’’ ƀă veăng gum rak, mơnhông mâu ki kơnía ‘na khôi túa lĕm, tơdroăng mơnhông dêi hdroâng mơngế Việt Nam ing mâu rơxông.