Ƀă dó inâi ‘’Tơdrá chuât xơtó rơdâ’’, tơdroăng châ pơxiâm po ƀă tơdroăng prôk pơtăng dêi mâu ngê̆ nhân, vêh mơhno um méa pơlê pơla mâu hdroâng kuăn ngo rơtế tơkŭm a ‘’pơlê tơdjuôm’’ – tíu tơdjêp khôi túa lĕm tro, tơdjêp tơdroăng loi tơngah, rơtế tơmiât troh pơkâ xiâm mơjiâng Gia Lai kro mơdrŏng lĕm, tơrŭm môi tuăn ƀă mơnhông krá tơniăn.

Pơtối cho tơdroăng ngê̆ thuât ƀă mâu tơdroăng tôu chêng koăng mơhno tơdroăng rêh ối vêa vong lĕm tro vâi krâ nah, tơdroăng ki vâ mơ-eăm dêi kuăn pơlê mâu hdroâng kuăn ngo. Tung mê, mâu khu ngê̆ nhân lo ing 17 tơring, pơlê krâm, pơlê kong kơdrâm tung kong pơlê hiăng vêh po hên tơdroăng leh, khôi túa lĕm tro vâi krâ nah môi tiah: Leh tơdah têa vêh a pơlê, mơdĭng kâ kơpôu, tĭng mơnê, tĭng Sơmă Kơcham (tĭng kâ báu nếo), ngê̆ thuât rơhdruê tuồng, teăn ếo pơtâk ƀă hía hé.