Hơnăm 2024, tê kơphế ngi kong têa dêi Việt Nam châ 1,32 rơtuh tâ̆n, liăn châ xo vâ chê 5,5 rơtal dollar. Maluâ hlo tơ’lêi hlâu kân, kơvâ kơphế Việt Nam trâm ƀă hên tơdroăng pơloăng mơnúa tung pơla pêt rak ngăn krá tơniăn, malối cho tung pơla rak ngăn tơdroăng ki mơ’no tah trếo ƀă xúa mâu pơkeăng xôh kơdê oâ hdrong tung pêi chiâk.

Vâ mơnhông kơvâ kơphế mơjiâng krá tơniăn, khế 6/2024, tơdroăng tơkêa “Mơjiâng tơpui kâ troăng tŏng gum, mơdêk ivá tơxup ƀă ki rơkê plĕng tung tơdroăng ki xúa mâu pơkeăng xôh kơdê oâ hdrong tung pêi chiâk, gô̆m ‘măn chôu môi tíu ƀă mơ’no tah trếo ‘mêi tung pêt rak ngăn kơphế a Việt Nam” hiăng păng ‘nâng châ pơxiâm po.

Ƀă ki xiâm cho pro kơdroh kơtăn pơla pêi lo liăn ăm iâ hlái 150 rơpâu rơpŏng kuăn pơlê pêt kơphế a Việt Nam a hơnăm 2030, mâu kăn hiăng tơpui ‘na mâu ƀai hriâm ki rơkê plĕng dêi tơdroăng tơkêa; tối ‘na mâu túa pơkâ, troăng pêt kơphế tơƀrê, krá tơniăn; mâu túa pơkâ xúa mâu pơkeăng xôh kơdê oâ hdrong tung pêi chiâk ki rơkê plĕng, gô̆m xo ‘măn chôu môi tíu ƀă mơ’no tah trếo ‘mêi ƀă hên tơdroăng ki ê. Tơdrêng amê hlối pơkâ mơ’no troăng hơlâ tŏng gum ƀă pro tơ’lêi hlâu tơdjêp pơla rêm pâ ki ai tơdjâk tung pêt kơphế krá ton a Việt Nam.