Hên khu ki vâ ôu kơphế dâi lĕm khât hiăng ai hên hĕng tung pơlê pơla, ing mê, khoh chiâng ai tơdoăng ki mơdró kơphế ôu ai hên túa ki vâ bro kơphế chiâng dâi lĕm tung tê mơdró. Hlo ai tơdroăng mê, hên khu mơdró kâ a kong pơlê Gia Lai hiăng djâ troăng ahdrối tung mơ’no liăn vâ rôe ki kố ki mê, prôk troh a túa ki pêt pêt, rak ngăn, uâ mơdiê, chôu ‘măn, tê mơdró, xua mê, ing tơdroăng ki tăng hdrê, pêi pêt troh a têng, uâ mơdiê. Pôa Nguyễn Tiến Định - Kăn pơkuâ ngăn Kŏng ti Tơlo liăn cheăng Kơphế Việt Nam United, tơring Chư Prông, kong pơlê Gia Lai ai tối:

“Ngin hlo tơdroăng ki kơphế dâi lĕm cho troăng hơlâ dêi kơvâ kơphế tung lâp plâi tơnêi, xua mê, ngin ôh tá xê ối pá kong. Tung pơla pêi cheăng ƀă mâu rơpŏng, ngin xuân hiăng hbrâ tối tơbleăng troăng hơlâ ƀă kuăn pơlê vâ vâi hlê plĕng nhên vâ tê châ yă kơphế hên tâ mê athế thăm mơdêk ki kơnía dêi kơphế vâ pêi lo liăn hên tâ”.

Ôh ta xê to tơdroăng cheăng dêi khu mơdró kâ, mê kơphế ki dâi lĕm xuân mơjiâng chiâng mâu tơdroăng ki pơhlêh tung túa pêi pêt mơjiâng tơmeăm dêi kuăn pơlê ƀă khu mơdró kâ. Ing tơdroăng ki xiâm tung pêi pêt kế tơmeăm chiâng tơdroăng ki pêt pêt krá tơniăn ton, vâi krâ-nhŏng o hiăng xúa túa cheăng ki dâi mâu phon hlá nhâ, krí xo, xếo plâi ƀă têng a tơdrá.

A tơring Đăk Đoa, Khu tơrŭm ngăn ‘na Chiâk deăng ƀă Mơdró Lam Anh hiăng ƀlêi chiâng tiô túa cheăng kâ ki pêt mơjiâng tơmeăm khoăng ki xúa phon hlá nhâ loăng. Kế tơmeăm ki mơjiâng ing kơphế dêi Khu ngăn ‘na pêi cheăng tơrŭm mê ôh tá xê to châ mơnhên inâi OCOP 2 hơlŏng, mê ối châ tơrŭm ƀă hên  mâu hngêi kơchơ ki pá vâ tí tăng rôe kơphế tơ’lêi hlâu, malối khu mơdró kâ kong têa ê. Pôa Lê Hữu Anh-Kăn pơkuâ ngăn khu pêi cheăng tơrŭm ai tối tiah kố:

“Ƀă um méa mơngế kuăn pơlê ki pêi hnoăng cheăng tiah hmâ, ai hnoăng cheăng ki loi tơngah kân khât tung ki kơnía dêi pơ’leăng kơphế, ngin hiăng pơhlêh túa rak ngăn kơdrum loăng, thăm mơdêk hnoăng cheăng ki dâi khât. Tơdroăng kố ôh ta xê to gum thăm mơdêk ki kơnía dêi pơ’leăng kơphế mê ối veăng gum mơdêk tơdroăng kơdroh tah kơklêa kơtiê xahpá, gum vâi krâ-nhŏng o pro kro mơdrong tro tơdroăng ing loăng kơphế”.

Dế nôkố, Gia Lai hiăng mơjiâng 34 tơdroăng ki tơrŭm ‘na pêi pêt mơjiâng, rak ngăn, tê mơdró kơphế, ƀă tâi tâng tơnêi pêt mê ai lối 43.500 ha; tơkŭm 26 khu mơdró kâ ƀă 8 khu ngăn ‘na cheăng tơrŭm. Hên khu mơdró kâ hiăng khên pêi pêt, rak ngăn deăng kơphế ki xúa phon hlá nhâ, mơ’no liăn vâ uâ mơdiê ăm i dâi lĕm vâ ing mê, thăm vâ mơdêk ki dâi lĕm khât ƀă thăm mơnhông ki kơnía dêi kơphế. Vâ kloăng kơphế ki tê mơdró dâi lĕm ƀă kơphế châ pêi pêt, rak ngăn lo ing túa cheăng tiah hmâ hdrối mê hía nah, khu kăn pơkuâ dêi mâu pơlê cheăm, tơring tung kong pơlê dế pơkâ pêi pro hên troăng hơlâ ki vâ tŏng gum păng ‘nâng, ing tơdroăng pơkâ kơpong pêt ta troh a tơdjêp ƀă khu mơdró kâ ƀă kơchơ dêi lâp plâi tơnêi. Pôa Đoàn Ngọc Có, Phŏ Kăn pơkuâ ngăn ‘na chiâk deăng ƀă hyôh koing prâi kong pơlê Gia Lai tối ăm ‘nâi:

“Troh hơnăm 2030, pakĭng tơdroăng ki mơnhông pêt kơphế ki kơnía ai 2.340ha dêi Gia Lai kô ai 80% ƀăng deăng kơphế dêi lâp kong pơlê châ mơdâ pêt, rak ngăn tiô tơdroăng pơkâ, ai hlá mơ-eá mơnhên. Pakĭng tơdroăng ki pin mơnhông pêt kơhế ki dâi lĕm tro tiô tơdroăng pơqâ vâ tơxâng ƀă mâu hngêi kơchơ ki vâ rôe, Gia Lai xuân dế kơdo mơ-eăm tơ’mot hên khu mơdró kâ mơ’no liăn cheăng vâ mơjiâng tơdjâ túa pêi kâ a pơlê cheăm, tơring, mâu hngêi kơmăi ki têng, uâ, mơdiê kơphế, thăm mơdêk tơdroăng ki uâ mơdiê kơphế tung lâp kong pơlê kố, xuân môi tiah thăm mơdêk ki kơnía git dêi tơmeăm kơphế”.

Ƀă mâu tơdroăng ki kơdo mơ-eăm ôh ta la lâi pơtê dêi khu mơdró kâ, kuăn pơlê ƀă khu râ pơkuâ ngăn, kơphế Gia Lai dế chôa ‘lâng mơdêk tơdroăng ki vêh mơnhên a lơgât ki kơchuâ tối ‘na kơphế ki dâi lĕm khât dêi lâp plâi tơnêi. Tơdroăng ki pơhlêh ing túa ki tơprâ tơprŭng ukố umê pơhlêh chiâng túa ki pêt mơjiâng kơphế ki krá tơniăn hiăng vêh gum ăm tơná kuăn pơlê ki pêi chiâk pêi deăng, tơdrêng amê veăng gum thăm mơdêk inâi dêi kơphế Việt Nam.