Tung mâu hơnăm hdrối, cheăng mơnhông khu ki roê ƀaoh hiêm khăm pơlât a kong pơlê Dak Lak châ rêm râ, mâu kơvâ cheăng kal vâ ‘nâi plĕng tơbleăng pêi pro ƀă hiăng pêi châ rơhéa mâu tơdroăng ki kal. Hơnăm 2024, kơxô̆ ngế roê Ƀaoh hiêm khăm pơlât châ 93,5%. Riân troh tâi khế 3/2025, ai 1.690.238 ngế roê Ƀaoh hiêm khăm pơlât, tâk 19.163 ngế tâng vâ pơchông ƀă khế kố hơnăm 2024. Nôkố a kong pơlê ai 44 tíu khăm pơlât kĭ tơkêa khăm pơlât Ƀaoh hiêm khăm pơlât ƀă kơ koan Ƀaoh hiêm xah hô̆i kong pơlê Dak Lak, tung mê ai 25 tíu khăm pơlât kông lâ̆p, 19 tíu khăm pơlât ôh ti xê kông lâ̆p. Mâu tíu khăm pơlât Ƀaoh hiêm khăm pơlât tâk rế hên tiô hơnăm.

Pơla hdrối nah, mâu tơdroăng ki pơxúa ki Ƀaoh hiêm khăm pơlât djâ ăm ngế ki châi tamo pơrá hlo nhên. Laga, tung pơla roê ối ai mâu tơdroăng ki tá hâi tơtro, pro pá ăm ngế ki roê. Tiô Luât Ƀaoh hiâm khăm pơlât, ngế ki châi tamo a râ pá xôp rơhêng vâ khăm pơlât a râ kơpêng (ôh tá riân ngế ki pơlât tơdrêng) athế châ tíu khăm pơlât apoăng mê hbru ăm hlá mơ-éa pơhlêh râ mê nếo châ khăm pơlât a râ kơpêng ƀă châ pơxúa tiô phĭu Ƀaoh hiêm khăm pơlât. Tơdroăng kố pro pá ăm hên ngế ki châi tamo ƀă rơpŏng hngêi xua athế mơdon hên troăng ƀă ivá vâ chêh pro klêi mâu mơ-éa.

Nâ Lê Thị Hạnh, a bêng Ea Tam, Pơlê kong kơdrâm Ƀuôn Ma Thuột, ai nôu tro pơreăng ŭm tung châ, pơlât a Hngêi pơkeăng Ung Bướu (Pơlê kong kân Hồ Chí Minh) hiăng hên hơnăm kố. Xua tíu chêh inâi khăm pơlât apoăng cho a Hngêi pơkeăng kân kơpong Tây Nguyên, mê rêm rôh jâ lăm vêh khăm pơrá athế troh akố vâ mơéa pơhlêh hngêi pơkeăng khăm. Nâ Lê Thị Hạnh ăm ‘nâi:

 “Nôu á tro pơreăng ŭm tung châ hiăng hên hơnăm kố. Hmâ 2-3 khế athế lăm hngêi pơkeăng a Pơlê kong kân Hồ Chí Minh vâ khăm, pơlât ƀă athế đi đo pâ mơ-éa pơhlêh hngêi pơkeăng khăm. Hngêi hngế mê tơdroăng ki prôk lăm gá pá, mơdoh hên hâi chôu, liăn ngân. Drêng ‘nâi tiô pơkâ dêi Luât Ƀaoh khăm pơlât ‘mâi pơhlêh, tơdroăng châi dêi nôu á châ lăm khăm tơdrăng a hngêi pơkeăng râ kơpêng ôh tá êa kal pâ mơ-éa pơhlêh hngêi pơkeăng khăm, á hlo phiu ro khât. Phiu ro drêng Luât Ƀaoh hiêm khăm pơlât ai hên tơdroăng ki pơhlêh ai pơxúa ăm ngế ki châi tamo”.

Luât ‘mâi pơhlêh, ‘mot tơ’nôm mâu tơdroăng dêi Luât Ƀaoh hiêm khăm pơlât pơkâ: ngế ki châi tamo râ, châi tamo ôh tá chiâng pơlât prêi châ pơtroh tơdrăng troh a tíu khăm pơlât râ ki vâi pơlât má mơ’nui. Tơdroăng kố gum ngế ki tamo mê ƀă rơpŏng hngêi vâi kơdĭng hâi chôu, ivá pro mơ-éa pơhlêh hngêi pơkeăng pơlât, luâ tâi ki ê gá chiâng rak tơniăn hâi chôu tung tơdroăng pơlât.

‘Na ‘mâi pơhlêh kơlo ‘no hrê liăn khăm pơlât, Ƀaoh hiêm khăm pơlât tơngah kô pêi pro châ hên tâ hnoăng pơxúa dêi ngế ki roê, malối cho mâu kơtiê, pêi lo liăn iâ, gum kơdroh ki pá ‘na liăn ngân drêng tro châi tamo. Kơlo nâp drêng khăm a mâu tíu khăm pơlât apoăng tung lâp tơnêi têa kô tâk 100%, hdrối nah cho 80%.

Ai mâu tơdroăng ki châ tâi tâng mâu ngế ki châi tamo kal vâ ‘nâi plĕng nôkố cho tơdroăng ki ôh tá bê pơkeăng, kế xúa tung khăm pơlât a mâu hngêi pơkeăng. Xiâm kố xua tơdroăng ki tê tơbriât mâu tơmeăm a mâu tíu khăm pơlât trâm hên xơpá. Tung tơdroăng ki ai khât, tung pla hdrối nah, hên ngế ki châi tamo roê Ƀaoh hiêm khăm pơlât la athế roê xêh pơkeăng, tơmeăm xúa tung khăm pơlât. Tơdroăng kố pro ăm ngế ki roê Ƀaoh hiêm khăm pơlât chiâng hêng hôu. Luât ‘mâi pơhlêh, ‘mot tơ’nôm: tâng ƀok thái pơkeăng chêh mơ-éa pơkeăng ối tung inâi ƀaoh hiêm gum liăn roê la rôh ki mê hngêi pơkeăng ôh ti ai pơkeăng, ngế ki châi tamo mê athế roê pơkeăng pa kong mê ƀaoh hiêm kô mơdrếo liăn ăm ngế châi tamo drêng ai tŭm mơ-éa chêh inâi pơkeăng dêi ƀok thái pơkeăng thế roê môi tiah ƀă inâi mơdrếo liăn dêi Ƀaoh hiêm khăm pơlât.

Pakĭng mê, Luât ƀaoh hiêm khăm pơlât ‘mâi pơhlêh, ‘mot tơ’nôm ngế ki roê Ƀaoh hiâm khăm pơlât pơklât cho mâu ngế cheăng khăm pơlât thôn pơlê, ngế ki ngăn ngế ki rơneh kuăn a thôn pơlê, khu ki veăng rak vế gâk kring tơniăn a thôn pơlê, ngế ki ing 75 hơnăm tơngi klêng dế châ kâ liăn gum ing tơdroăng ki hlâ rêm khế, ngế ki hiăng châ 70 hơnăm troh 75 hơnăm ối tung rơpŏng vâ chê kơtiê dế châ kâ liăn tŏng gum rêm khế ƀă hên ki ê. Mâu tơdroăng ki ‘mâi pơhlêh, ‘mot tơ’nôm kố tơtro ƀă ki khât, tơdrêng amê hlối rak vế hnoăng pơxúa dêi ngế ki roê Ƀaoh hiâm khăm pơlât, pro tơdroăng loi dêi ngế châi tamo tung mâu tơdroăng tŏmg gum dêi Đảng, Tơnêi têa.

Pôa Trịnh Văn Hùng (69 hơnăm, a bêng Ea Tam, Pơlê kong kơdrâm Ƀuôn Ma Thuột) phiu ro drêng ‘nâi Luât Ƀaoh hiêm khăm pơlât kô tơmâng ngăn tâ troh tơdroăng rak ngăn ivá châ chăn mâu ngế ki hiăng hên hơnăm:

“Hdrối nah, tơdroăng ki châ xúa khăm pơlât ki chía tơniăn trâm hên xơpá xua iâ ‘na tơdroăng ki pơxúa ing Ƀaoh hiêm khăm pơlât. Nôkố ƀă Luât nếo, ngin ai tơ’nôm rôh vâ khăm pơlât tro tâ, malối cho la ngiâ ah Ƀaoh hiêm khăm pơlât kô hrê ăm liăn ‘na khăm a hngêi. Mâu ngế ki hiăng hên hơnăm môi tiah á kố kô ôh tá kal troh a hngêi pơkeăng xếo la xuân ối châ khăm ƀă rak ngăn ivá châ chăn”.

Mâu tơdroăng ki vêh tơbleăng tro sap ing ngế ki châi tamo ‘na tơdroăng ki ‘mot tơ’nôm, ‘mâi pơhlêh mâu tơdroăng dêi Luât Ƀaoh hiêm khăm pơlât châ xêt khât sap ing hâi lơ 1/7/2025 ăm hlo troăng pơkâ kố dế châ kuăn pơlê hâk vâ khât, tơngah kô veăng gum mơdêk ki lĕm tro tung rêh ối, mơdêk tơdroăng tơdâng tơ’mô tung khăm, pơlât rak ngăn ivá ƀă rak vế tơdroăng tŏng gum pơlê pơla.

Bro tơ’lêi hlâu vâ kuăn pơlê châ khăm ƀă Baoh hiêm khăm pơlât

Tơdroăng ‘mâi hơ’lêh Luât ƀaoh hiêm khăm pơlât hơnăm 2024 kô tah lối mâu tơdroăng ki pro pá, tơvâ tơvân hiăng châ pro hlâu, vâ pro tơ’lêi má môi, tơniăn hnoăng ki pơxúa má môi ăm mơngế ki rôe ƀaoh hiêm khăm pơlât... Vâ kuăn pơlê ‘nâi nhên mâu tơdroăng pơkâ ki nếo, hnoăng ki pơxúa  drêng lăm khăm pơlât châi tamo ƀă Ƀaoh hiêm khăm pơlât sap ing hâi lơ 1/7/2025, jâ Đàm Thị Thanh Quế, Phŏ kăn pơkuâ Ƀaoh hiêm xah hô̆i kong pơlê Dak Lak kô tối nhên tâ.

-Luât ‘mâi hơ’lêh, tơ’nôm mâu tơdroăng Luât Ƀaoh hiêm khăm pơlât vâ troh mơdêk hnoăng ki pơxúa ăm kuăn pơlê môi tiah lâi, ô jâ?

Jâ Đàm Thị Thanh Quế: Luât Ƀaoh hiêm khăm pơlât ‘mâi hơ'lêh, tơ’nôm hơnăm 2024 châ Kuô̆k hô̆i tơbleăng a hâi lơ 27/11/2024  ƀă xêt khât sap hâi lơ 1/7/2025 ai hên tơdroăng ki pơhlêh vâ pro pơxúa xuân môi tiah tung tơdroăng châ kring vế ing liăn ‘măn kơdĭng Ƀaoh hiêm khăm pơlât tung lâp tơnêi têa. Tung mê, ai mâu tơdroăng châ mơngế veăng tơmâng mê cho tơdroăng ki pơxúa xuân môi tiah kơlo xúa lăm khăm pơlât ƀă Ƀaoh hiêm khăm pơlât.

Luâ̆t  Ƀaoh hiêm khăm pơlât nếo po rơdâ tơdroăng ‘na khăm pơlât châ Liăn ‘măn kơdĭng Ƀaoh hiêm khăm pơlât ăm drêng pơlât, kum mơngế ki châi tamo châ pơlât ƀă pơkeăng ki dâi lĕm, tơƀrê sap nah tá hâi chói ai.  Ki tơxâng vâ tối ƀă mâu ngế châi tamo ki iâ trâm hlo lơ ai tơdroăng châi ki pá pơlât prêi kô châ pơlât ƀă pơkeăng, kơmăi ki dâi lĕm tâ a mâu hngêi pơkeăng râ kơpêng la ôh tá êa pêi pro tiô pơkâ ‘na pơtroh pơlât a hngêi pơkeăng râ kơpong môi tiah hdrối nah. Tơdroăng kố hiăng kum rĕng iâ hâi chôu vâ châ khăm pơlât ƀă ki tơƀrê tung rak ngăn ƀă khăm pơlât. Pakĭng mê, Luât nếo xuân tơ’nôm mâu ngế ki châ xúa 100% kơxô̆ liăn khăm pơlât a mâu hngêi pơkeăng ki chêh inâi khăm pơlât apoăng tung lâp tơnêi têa. Má péa, cho tơdroăng ‘na ăm liăn tâi 100% kơxô̆ liăn pơlât koi a hngêi pơkeăng cheăm bêng ki hiăng kĭ hơp đŏng khăm pơlât râ ki kal tung lâp tơnêi têa. Châ xúa tâi kơxô̆ liăn pơlât tiô pơkâ ki xúa drêng khăm pơlât châi tamo ƀă Ƀaoh hiêm khăm pơlât a mâu hngêi pơkeăng ƀă a râ ki pơlât kân tâ tâng hiăng pơkâ hdrối hâi lơ 1/1/2025 tíu khăm pơlât mê cho hngêi pơkeăng râ tơring.

Ƀă mâu kuăn ngo, kơxô̆ rơpŏng kơtiê dế rêh ối a kơpong cheăng kâ ki ối xơpá lơ xơpá ó, kuăn pơlê a kơpong cheăm a rơlố kô châ hngêi pơkeăng ‘no tâi kơxô̆ liăn khăm pơlât a mâu  hngêi pơkeăng ki pơlât ai hên pơkeăng tơmeăm pơlât lĕm dâi tâ.

Krê ƀă mâu tơdroăng châi ki iâ trâm, tơdroăng châi ki pá pơlât prêi kal thế pơlât, pâ, mê liăn ‘măn kơdĭng Ƀaoh hiêm khăm pơlât kô gum tâi kơxô̆ liăn pơlât ƀă kơlo ki xúa tiô pơkâ drêng pơlâ a hngêi pơkeăng râ kơpêng. Pro tơ’lêi hlâu ăm kuăn pơlê châ pơlât a mâu hngêi pơkeăng ki ai kơmăi dâi lĕm tâ ƀă ôh tá trâm pá ‘na liăn ngân.

Ƀă Luâ̆t ki nếo, môi tơdroăng tơxâng vâ tối nếo cho hnoăng ki pơxúa  drêng pơlât  ƀă khúc xạ ƀă  pơlât ‘liâng mâ xuân châ ’mâi hơ’lêh. Hdrối nah, liăn ‘măn kơdĭng Ƀaoh hiêm khăm pơlât ‘no kum pơlât ăm vâi hdrêng pá xôp 6 hơnăm, troh nôkố hiăng pơ’lêh po rơdâ troh mâu ngế châ xúa tơdroăng pơlât mê kum ăm hên ngế châ xúa pơlât ƀă pơkeăng kơmăi ki  lĕm dâi tâ.

-Luâ̆t ‘mâi hơ’lêh, tơ’nôm mâu tơdroăng dêi Luât Ƀaoh hiêm khăm pơlât ai hên tíu pơ’lêh,  tung mê ai tơdroăng ‘na pro hlá mơ-éa khăm pơlât ƀă Luât Ƀaoh hiêm khăm pơlât châ pro tơ’lêi tâ, kuăn pơlê ôh tá êa mơhno theh Ƀaoh hiêm khăm pơlât ƀă hlá mơ-éa. Pâ vâi krâ nhŏng o thế ‘nâi nhên tâ ‘na tơdroăng mê?

Jâ Đàm Thị Thanh Quế: Vâ veăng pêi pro tro tơdroăng tơkêa bro chêh ‘măn tung kơmăi ‘na tơdroăng kuăn pơlê, định danh hlối mơnhên ƀă điê̆n tưh vâ xúa tung pro hlá mơ-éa pơ’lêh kơxô̆ dêi tơnêi têa. Vâ tơƀrê ‘mâi hơ’lêh tung pro hlá mơ-éa, tơ’lêi hlâu ‘na pro hlá mơ-éa, kơdroh pro hồ sơ chêh ƀă hlá mơ-éa, kơdroh hâi chôu ƀă kơxô̆ liăn nâp drêng khăm pơlât.  Pêi pro tiô troăng hơlâ dêi kơvâ Ƀaoh hiêm khăm pơlât Việt Nam, Ƀaoh hiêm khăm pơlât  kong pơlê Dak Lak kô ôh tá in theh Ƀaoh hiêm khăm pơlât  ƀă hlá mơ-éa sap hâi lơ 1/6/2025. Mâu ngế ki rôe Ƀaoh hiêm khăm pơlât  drêng khăm pơlât châi tamo kô pơtối xúa theh Ƀaoh hiêm khăm pơlât ƀă hlá mơ-éa hiăng pơ’lêh hdrối mê lơ xúa căn cước công dân ki krâ chip lơ xúa um theh Ƀaoh hiêm khăm pơlât tung ứng dụng VssID (Bảo hiêm xah hô̆i kơxô̆) lơ tung ứng dụng VneID mơhno ăm drêng khăm  pơlât. Pêi pro tơdroăng in theh Ƀaoh hiêm khăm pơlât ƀă hlá mơ-éa ƀă mâu ki ki ôh tá chiâng cài đặt ứng dụng VssID lơ ứng dụng VneID lơ ngế ki ôh tá ai căn cước công dân ki krâ chíp.

Ƀă mâu ngế ki trâm pá, oh tá hlê tung tơdroăng cài đặt  VssID (Ƀaoh hiêm xah hô̆i kơxô̆) pơkâ thế kơ-êng ƀă kơ koan Ƀaoh hiêm xah hô̆i ki achê má môi vâ châ kơjo kum pêi pro.

-Tung la ngiâ, vâ tơ’lêi hlâu xuân môi tiah vâ tơniăn hnoăng ki pơxúa ăm mơngế ki rôe Ƀaoh hiêm khăm pơlât, kơ koan Ƀaoh hiêm xah hô̆i kô ai mâu tơdroăng hnê pêi pro tiah lâi, ô jâ?

Jâ Đàm Thị Thanh Quế: Tung pơla hdrối kô hía nah, tơdroăng pêi pro rế tơƀrê Ƀaoh hiêm khăm pơlât tung kong pơlê Dak Lak đi đo châ tơmâng khât ing mâu kăn, hnê mơhno dêi Ƀaoh hiêm xah hô̆i Việt Nam, dêi Khu kăn pơkuâ hnê ngăn Đảng kong pơlê, Hô̆i đong  Kuăn pơlê, Vi ƀan Kuăn pơlê dêi kong pơlê Dak Lak ƀă châ tơrŭm tơtro, nhên  khât dêi mâu khu râ kơvâ cheăng ƀă mâu kơ koan chêh hlá tơbeăng. Tung la ngiâ, vâ tơ’lêi ăm kuăn pơlê ki rôe, Ƀaoh hiêm xah hô̆i kong pơlê Dak Lak xuân pơkâ mâu troăng hơlâ: mê thế ai veăng tơmâng dêi mâu râ Đảng, mâu Kăn cheăm kong pơlê, kố cho tơdroăng ki xiâm pơkâ ki pơxúa tung tơbleăng pêi pro tiô luât tŏng kum Ƀaoh hiêm xah hô̆i, Ƀaoh hiêm khăm pơlât tung kong pơlê. Ing mê, kơ koan Ƀaoh hiêm xah hô̆i kong pơlê Dak Lak kô po hên khu pêi cheăng tơdrêng ƀă mâu cheăm, tơring vâ tối tơdroăng cheăng xo, kơdroh chĕn ƀă tơdroăng rế ai hên ngế xuân môi tiah tối nếo ki xơpá, tơvâ tơvân tung pơla pêi pro vâ ing mê pơkâ troăng hơlâ teăm tơdrêng, pêi nhên khât vâ pê klêi tro mâu tơdroăng cheăng ki pơcháu tung hơnăm 2025. Pơtối mê cho mơdêk tơdroăng hnê tối mâu luât pơkâ tŏng kum ‘na Ƀaoh hiêm xah hô̆i, Ƀaoh hiêm khăm pơlât. Tơmâng khât a tơdroăng hnê tối cho tơkŭm po hneăng hôp tiah hmâ, tơpui tơno, tơmâng khât a hnê tối tung hlá tơbeăng rơ’jíu mê cho tơbleăng a cổng thông tin điê̆n tưh ƀaoh hiêm kong pơlê, măng xah hô̆i, tơbleăng tung fanpage, facebook, zalo lơ ing kơxô̆ phôn vâ hnê tối ăm ‘nâi ‘na Ƀaoh hiêm xah hô̆i kong pơlê.

-Mơnê kơ jâ hiăng tối ăm ‘nâi mâu tơdroăng mê!