4 hơnăm hdrối mê hía nah, mâu râ kăn pơkuâ, rêm râ kong pơlê Kon Tum hiăng mơjiâng, rak lối 1.200 troăng pêi tŏng kum kuăn pơlê hdroâng kuăn ngo.

Ing mâu troăng pêi kố, hiăng mơhnhôk châ lối 140 rơtal liăn tŏng gum kuăn pơlê mơnhông cheăng kâ; pro ăm i lĕm kơdrum deăng; pơtâng tối luât; tah lôi mâu vêa vong ki ôh tá tro... Ing mê, kum lối 37.300 rơpŏng hdroâng kuăn ngo kơtiê, vâ chê kơtiê chôa ‘lâng tah lôi vêa vong ôh tá tro, chiâng xúa khoa hok kih thuât tung pêt mơjiâng tơmeăm; lối 4.500 rơpŏng hluăn ing kơtiê krá tơniăn.

Khu kăn pơkuâ hnê ngăn Đảng kong pơlê Kon Tum mơnhên ki châ tơƀrê, tơdroăng ki kal rak roh mơhnhôk kố klêi kơ’nâi tơmot chiâng môi kong pơlê ƀă troăng pêi po ăm khu râ kăn pơkuâ pêi cheăng 2 râ mot pêi cheăng tung la ngiâ. Khu kăn pơkuâ hnê ngăn Đảng kong pơlê Kon Tum pro pơkâ tung hơnăm 2025 kô kơdroh kơxô̆ rơpŏng kơtiê, vâ chê kơtiê hdroâng kuăn ngo sap ing 3 – 4% tâng pơchông ƀă hơnăm 2024.