Hâi lơ 6/5, Vi ƀan kong pơlê Dak Lak tơbleăng mơ-éa pơkâ mâu khu, kơvâ cheăng ƀă khu râ kăn pơkuâ pêi pro kơtăng tơdroăng kheăn hôu mâu ngế pêi cheăng tơnêi têa pro xôi, mâu tơdroăng pơkâ tung pơkuâ tơnêi têa, ‘mâi rơnêu tơdroăng pêi cheăng tung tơdroăng pêi pro rah xo bro lế lĕm tro tíu pêi cheăng tơnêi têa râ tơring, râ cheăm. Tơdroăng kố pêi pro tung pơla, a hên roh hôp achê kố dêi Khu kăn pơkuâ hnê ngăn Đảng ủi ƀă Vi ƀan kong pơlê, tơdroăng kăn ƀô̆, kŏng chưk a mâu pơlê pơla râ tơring, cheăm ai tơdroăng mơhno ki môi tuăn tung khu, pro pơhôi tơdroăng cheăng, ai tơmiât ‘’tơkôm tơmot chiâng môi’’, hiăng châ khu râ kăn pơkuâ kong pơlê tối nhên ƀă kheăn hôu kơtăng.

Ai tíu ki ‘na u ối tơdroăng ví hnoăng cheăng, ôh tá vâ tơbleăng, pơkâ tơdroăng, tơdjâk troh tơdroăng hbrâ ƀă tơdroăng pêi cheăng dêi mâu tíu cheăng klêi kơ’nâi tơmot chiâng môi. Drêng ai tơdroăng môi tiah kố, Vi ƀan kong pơlê Dak Lak pơkâ mâu kơ koan, tíu cheăng tơkŭm tơleăng kêi đeăng tơdroăng ki u ối, tơniăn tíu pêi cheăng tơnêi têa nếo mot pêi cheăng tơ’lêi hlâu, châ tơƀrê sap ing apoăng.