A rôh hôp tơpui tơno, pôa Tô Lâm, Kăn xiâm pơkuâ hnê ngăn Đảng tối nhên, Việt Nam đi đo nhoăm ƀă tơpui a hdrối ‘na tơdroăng tơrŭm cheăng kâ ƀă kong têa pú tơrŭm tiô khôi hmâ ing nah, tung mê, ai Kazakhstan; mơnê Kazakhstan hiăng gum Việt Nam tung tơdroăng cheăng kâ tơplâ pro tơleăng lĕm hdroâng mơngế hdrối nah xuân môi tiah tơdroăng mơjiâng ƀă mơnhông tơnêi têa nôkố.

Péa ngế kăn xiâm tối, tơdroăng mơjiâng tơrŭm cheăng nếo kô veăng pro krá kak tâ, ai 5 tơdjêp pơla péa tơnêi têa nôkố, mê cho:  Tơdjêp pơla kuăn mơngế ƀă kuăn mơngế, tơdjêp cheăng kâ, tơdjêp ƀă luât pơkâ, tơdjêp ƀă troăng prôk ƀă tơdjêp tung kơpong. Péa ngế kăn khĕn kơdeăn mâu tơdroăng hiăng pêi pro châ tơƀrê tung tơrŭm cheăng kâ, tê mơdró ƀă ‘no liăn cheăng; tối péa kong têa cheăng kâ ai hên tơmeăm khoăng vâ mơnhông tơƀrê tâ nếo; loi nhoăm tơdroăng tơrŭm cheăng ƀă dêi rơpó hlối nếo mơjiâng kô pro xiâm ki nếo ăm tơdroăng tơrŭm cheăng kâ pơla péa tơnêi têa, djâ tê mơdró tâk luâ péa hdroh tung la ngiâ.