Klêi Khu xiâm ngăn cheăng pêi ai hlá mơ-éa hnê ăm 2 kong pơlê Kon Tum ƀă Quảng Nam pêi pro klâ tơnêi tíu a kơpong tơkăng kong cheăm Trà Vinh dêi tơring Nam Trà My, kong pơlê Quảng Nam ƀă cheăm Đăk Nên dêi tơring Kon Plông, kong pơlê Kon Tum. Vi ƀan Kuăn pơlê dêi kong pơlê Kon Tum pâ thế Kuô̆k hô̆i tơleăng mơnhên klêi tơdroăng ki ối tơvâ tơvân ‘na kuăn pơlê.

Ing mê, Vi ƀan Kuăn pơlê dêi kong pơlê Kon Tum pơkâ thế Vi ƀan Pơkuâ cheăng Kuô̆k hô̆i séa ngăn, môi tuăn tơleăng mơnhên klêi tơdroăng ‘na kuăn pơlê cheăm Trà Vinh, tơring Nam Trà My, kong pơlê Quảng Nam rêh ối tung cheăm Đăk Nên, tơring Kon Plông, kong pơlê Kon Tum.

Vâ tơleăng klêi tơdroăng tơvâ tơvân, Vi ƀan Kuăn pơlê dêi kong pơlê Kon Tum  pơkâ thế pêi pro 2 tơdroăng, mê cho: Pơtroh inâi rơpŏng hngêi dêi 187 rơpŏng (1.034 pơ’leăng mâ mơngế) kuăn pơlê thôn 3, cheăm Trà Vinh, tơring Nam Trà My, kong pơlê Quảng Nam cho ối tung hnoăng rak ngăn dêi pơlê kong kân Đà Nẵng (klêi tơ’mot pơlê kong kân Đà Nẵng ƀă Quảng Nam tơdjuôm) lơ ‘mot mâu kuăn pơlê mê mot tung inâi rơpŏng hngêi tung kong pơlê Quảng Ngãi (Klêi tơ’mot tơdjuôm kong pơlê  Quảng Ngãi-Kon Tum).