Tiô tối tơbleăng a rôh hôp, khế 4, tơdroăng cheăng kâ pơtối tâk, cheăng kâ kân hlo tơniăn, pro mơhrê châ mơdât, mâu tơdroăng pro tơdâng tơ'mô kân châ rak tơniăn, hên tơdroăng pơkâ pêi, kơlo kơxô̆ tro tâ tâng vâ pơchông khế hdrối ƀă khế kố hơnăm hdrối. Mơjiâng pro tơmeăm ƀă kơmăi kơmok tâk vâ chê 9%; tâi tâng kơlo tê ‘ngré tơmeăm ƀă kơxô̆ liăn châ xo ing tơdroăng ki roê tơmeăm tâk lối 10% ƀă hên ki ê.

A rôh hôp, pôa Phạm Minh Chính, Ngế pro xiâm hnê ngăn Chin phuh tối nhên tơdroăng mơ-eăm, kơhnâ ƀă hbrâ pêi, rơkê, tơmiât rơkê tung pơkuâ, hnê mơhno vâ pêi pro chiâng ƀlêi mâu tơdroăng pơkâ pêi kân, ai tơmiât pêi tơdroăng tung la ngiâ mê cho mơdêk thăm mơnhông, hbrâ mơdât pro mơhrê, tơniăn liăn ngân kân, rak vế tŏng gum pơlê pơla.

‘Na mâu hnoăng cheăng, troăng hơlâ ki kal tung la ngiâ, Ngế pro xiâm hnê ngăn tơnêi têa xuân pơkâ thế pơtối pêi pro klêi troăng tŏng gum, pro iâ tơkŭm, kơ koan cheăng, mơdêk rơdêi túa pơhlêh chêh pro mơ-éa, pơhlêh kơxô̆. Pôa pơkâ thế mâu khu xiâm, kơvâ cheăng, kong pơlê tung hơnăm 2025 kơdroh iâ hlái 30% hâi khế chêh pro hlá mơ-éa; tah lôi iâ hlái 30% tơdroăng pơkâ tê mơdró ƀă hên ki ê.