
Tơring Dak Mil ai ƀăng deăng loăng plâi ton hâi hên má môi kong pơlê Dak Nông. Kố xuân cho môi tung 3 tơring peăng Kơnhŏng kong pơlê Dak Nông, tro tơdjâk râ ó dêi tơdroăng ôh tá bê têa tôh tung ƀăng kân rơdâ.
Rơpŏng pôa Nguyễn Công Ngãi, ối a cheăm Dak Lao, tơring Dak Mil ai lối 2 ha kơphế pêt tơvât loăng plâi sầu riêng. Pôa tối ăm ‘nâi, rơpŏng tôh roh má 2 tá hâi klêi mê têa a long têa 40 (thôn Đắk Thọ) hiăng xiâ.
‘’Hơnăm kố têa xia rĕng ‘nâng, kuăn pơlê pêi chiâk deăng ngin ôh tá teăm. Nôkố rêm hâi ai to lâi chât to ƀơm hrik mơ’no têa a kĭng long têa 40, ƀă têa mot tung long ki hên kơnôm a kơmăi ƀơm dêi Kŏng ti rơchôa hno têa Dak Nông. Tâng vâi ƀơm têa a long têa đi đo mê xuân bu bê châ dâng 1/5 tơdroăng kal vâ tôh têa dêi vâi krâ kuăn pơlê’’.
Tiô Vi ƀan tơring Dak Mil, kong tô khăng khoăng pro vâ chê 5.000 ha loăng plâi tung tơring ôh tá bê têa tôh. Pakĭng mê, vâ chê 300 rơpŏng kuăn pơlê tơ’lêi ôh tá bê têa hum rôh jiếo a mơ’nui rơnó khăng khoăng.
A tơring Krông Nô, mâu kơpong drô têa plông Dak Sôr dế ôh tá bê têa tôh. Tâng kong mêi, tơ’lêi kong tô khăng khoăng ôh tá bê têa tôh dâng 1.000 ha loăng plâi.

Tiô pôa Võ Văn Minh, Phŏ Kăn pơkuâ Khu pơkuâ ‘na pêi chiâk deăng ƀă Kong prâi Dak Nông, tơdroăng kong tô khăng khoăng pơxiâm tơdjâk râ ó troh rơpâu loăng plâi, ki hên cho kơphế, tiêu ƀă plâi kâ. Sap ing tơdế khế 3, kơvâ cheăng hiăng mơ’no têa a mâu cheăm vâ ai têa tôh loăng plâi. Ki nhên, têa châ mơ’no ing loăng têa Tây ƀă mâu long têa ki achê ối tung tơring Dak Mil vâ tơ’nôm ăm kơpong ki kal têa tôh ối tung mâu tơring Dak Mil ƀă Krông Nô.
Vi ƀan kong pơlê Dak Nông hiăng ai hlá mơ-éa hnê mơhno kơvâ pêi chiâk deăng ƀă Vi ƀan kuăn pơlê mâu tơring, pơlê kong kơdrâm, kŏng ti mơ’no têa mâu tíu kơdoăng têa đi đo séa ngăn, lăm ngăn tơdroăng khăng khoăng ƀă pêi pro mâu troăng pêi, troăng tăng têa tôh. Kong pơlê xuân hnê mơhno pêi pro rĕng tơdroăng pêi pro 2 tơdroăng tơkêa bro mơdêk châ tơƀrê xúa têa tung tơring Čư Jut ƀă tơring Dak Mil (ƀă tâi tâng kơxô̆ liăn lối 500 rơtal liăn) vâ rak tơniăn mâu tơmeăm châ djâ tro tiô tơdroăng, teăm tơdrêng tơniăn bê têa tôh ăm kuăn pơlê pêi chiâk deăng, hum, rôh, jiếo.
Viết bình luận