Mâu hâi leh pơtê kố, pôa Phạm Xuân Hương rơtế ƀă mâu rơpŏng kuăn pơlê a O Sơr, cheăm Ia Kênh, pơlê kong kơdrâm Pleiku pơrá lăm pơtrui ngăn dêi ƀâng kong ki châ pơkuâ ngăn dêi Khu pơkuâ ngăn kong rak kơnhŏng têa Pá Kơnhŏng Biển Hồ. Pôa tối ăm ‘nâi:

“Rak vế, pêi pro hnoăng cheăng mê mâu rơpŏng ki tơdah xo ƀăng kong vâi hiăng thăm mơdêk pôu râng dêi hnoăng cheăng. Ki ahdrối tâ, hriâm tơdroăng cheăng tơná ‘na luât mơnhông ƀă gak ngăn kong, rak vế, pêi pro, lăm ngăn kong rêm hâi. Ki rơhêng vâ tối, hnê ăm kuăn pơlê, mâu rơpŏng ki pêi chiâk deăng tâ tá, achê kong vâ ôh tá ăm ai tơdroăng ki mơngế lăm chôu hdroh kong, ko ‘nhiê loăng, lo hdi tơbriât kong”.

Khu pơkuâ ngăn rak kơnhŏng têa Biển Hồ dế pơkuâ ngăn lối 9.000 ha kong, tơkâ luâ mâu tơring Chư Pah, Ia Grai, Đăk Đoa ƀă pơlê kong kơdrâm  Pleiku. Tung pơla kong dế tô mơdroăng, tâi tâng khu ki ngăn kong hiăng châ pơcháu hnoăng cheăng gak ngăn a mâu kong ilâng ki kân. Pôa Nguyễn Tất Thành-Kăn pơkuâ rak kong kơnhŏng têa Biển Hồ tối ăm ngin ‘nâi:

“Ing apoăng rơnó tôu mơdrăng khu kố hiăng pơkâ mơ’no hnoăng cheăng mê cho kơvê on, chôu hdroh lôi nhâ rơtôh, hlá pê, khu ngin hiăng pơkâ thế pêi pro tơdroăng pơkuâ rak ngăn kong. Tung rơnó tôu mơdrăng hiăng hbrâ rơnáu tơ’nôm 5 tíu a mâu kơpong ki pêt kong, tung mê, ai khu ki pơkuâ rak ngăn kong ƀă mâu rơpŏng ki xo rak ngăn kong, vâi pơhlêh dêi pó vâ rĕng teăm châ ‘nâi tơdroăng lơ tro on chếo kâ, pêi pro 4 hnoăng cheăng”.

Lâp kong pơlê Gia Lai ai 286 kơpong ki pêt kong tơ’lêi ai on chếo kâ, a râ má 5, ƀă tơnêi tíu kong ai lối 124.000 ha, ki hên cho kong ki nếo pêt, kong ilâng ai loăng hlá kơtâ kân ƀă loăng kơpeăng. Pôa Trương Văn Nam, Ngế ngăn ‘na pêt loăng mơjiâng kong Gia Lai tối ăm nâi:

“Khu rak ngăn loăng nhâ-kế kong hiăng tơrŭm cheăng ƀă Kŏng an kong pơlê mơjiâng troăng cheăng lăm mơnhên ngăn, hnê mơhnhôk a 17 tơring, pơlê kong krâm, pơlê kong kơdrâm ‘na hnoăng cheăng hbrâ mơdât, tơpâ on. Mâu khu ki pơkuâ ngăn kong hiăng hbrâ pơkâ pêi pro mâu tơdroăng cheăng hbrâ tơpâ mơdât on, môi tiah kơvê troăng, hdroh chôu lôi hlá pê, vâ mơdât tơdroăng ki tro on ing tíu ê lân chếo troh tung kong ilâng”.