
Tung hneăng hơnăm 2021 – 2024, kong pơlê Dak Lak hiăng ‘măn 35,7% tâi tâng liăn ngân kong pơlê ăm hnê hriâm, hnê mơjiâng tuăn ngôa rơkê ƀă hnê cheăng pêi ƀă lối 28.300 rơtal liăn. Laga, kơxô̆ mơngế pêi cheăng ing hnê mơjiâng ai ƀâng kâ̆p, chưng chih ƀă mơngế pêi cheăng ki rơkê khât ối iâ. Pôa Nguyễn Bá Thành, Kăn hnê ngăn Hô̆i đong pơkuâ hlối cho Kăn xiâm pơkuâ Kŏng ti xiâm tơlo liăn Kơtếo sik 333 Dak Lak tối, nôkố kŏng ti dế mơdêk mâu tơdroăng pêi pro mơjiâng tơmeăm, laga, laga ôh tá ai tŭm kŏng nhân kih thuât ki rơkê pêi cheăng pơkâ thế tíu pêi cheăng thế hnê mơjiâng tiô troăng "râng kŏng hnê pêi cheăng".
Mơhé 75% mơngế pêi cheăng tung kŏng ti hiăng ai ƀâng kâp, laga mơngế pêi cheăng kih thuât trâu hơngế, ki má lối cho mâu tíu pêi cheăng pơkâ thế ki rơkê plĕng rơxông nếo ƀă tơdroăng tơmiât pơhlêh nếo pêi rơkê... mê cho tá hâi tŭm hên mơngế. Pôa Nguyễn Bá Thành tối:
‘’Kŏng ngê̆ rơxông nếo mê cho tá hâi ai tơdroăng hnê mơjiâng tuăn ngôa rơkê ‘na kơvâ kơtếo sik mê ngin hbrâ hnê mơjiâng tơdrêng amê, mơngế pêi cheăng rơkê hnê ăm mâu ngế ki tá hâi chiâng. Ngế ton hnê ăm ngế ki nếo vâ pêi cheăng. Tâng hngêi kơmăi pơtroh lăm hnê mơjiâng a môi tíu pêi cheăng ki ê ôh tá tro tơdroăng cheăng mê xuân ôh tá châ tơƀrê klâi, ôh tá tơleăng châ tơdroăng tung tơdroăng cheăng ngin’’.

Tiô Tiên sih Nguyễn Thanh Trúc, Thái Hngêi trung Đăi hok Tây Nguyên, tơdroăng ôh tá tŭm mơngế pêi cheăng rơkê ăm Tây Nguyên nôkố, ai mâu tơdroăng trâm pá tá hâi châ tiâ tối sap ing apoăng. Ki nhên, tung kơxô̆ 35 kơvâ hnê mơjiâng đăi hok dêi hngêi trung, ai hên kơvâ ki tơtro ƀă ki phá tơ-ê dêi kong pơlê, ai tơngah khât ‘na pêi cheăng ƀă pêi lo liăn klêi lo mơgêi hngêi trung, pơtối ôh tá hâk vâ ƀă mơngế ki kĭ pêi cheăng:
‘’Khôu kơvâ nông lâm rah xo cho iâ, môi tiah hơnăm 2024 bu châ lối 50%. Laga tung tơbleăng pêi lo liăn cheăng pêi dêi sinh viên klêi mơgêi hriâm ngăn tơdjuôm sinh viên khu kơvâ nông nghiêp pơtối ai kơlo pêi lo liăn tơdah hên tâ mâu khu kơvâ ki ê laga mâu vâi o ôh tá rah kơvâ kố vâ tiô hriâm. Xua mê, xuân dế ai tơdroăng ki tơviah ‘na tơdroăng kal pơlê pơla’’.

A kơpong Tây Nguyên, Dak Lak cho kong pơlê kơdrâm kuăn pơlê má môi, ƀă lối 2 rơtuh ngế, laga ki rơkê dêi mơngế pêi cheăng cho tơdroăng ki má môi. Tiô pôa Nguyễn Thiên Văn, Phŏ Kăn hnê ngăn Vi ƀan kong pơlê Dak Lak, kơlo têk chu pêi cheăng hiăng hnê mơjiâng ai ƀâng kheăn kơdeăn, chưng chih a kong pơlê nếo châ dâng 1/5. Tơtrŏng má môi, kong pơlê tá hâi ai mơngế pêi cheăng ki rơkê a mâu kơvâ kal kŏng ngê̆ rơkê, pơkuâ xúa kŏng ngê̆, mơjiâng tơmeăm khoăng chiâng xêh. Tơdroăng ki kố tơdjâk tơdrêng troh pêi lo hên pêi cheăng ƀă ivá tơbriât dêi cheăng kâ kong pơlê.
"Kong pơlê Dak Lak nôkố tá hâi ai hên khu tê mơdró pêi cheăng tê mơdró kân, to ku kŭn ƀă lối kŭn, xua mê xuân tơdjâk troh tơdroăng hnê mơjiâng. Cho yôh a kố ai mâu kơvâ ƀă tơdroăng pêi pro laga ivá khu tê mơdró mê thế po rơdâ ƀă mơnhông pro rế kân mê nếo chiâng tơdah mơngế pêi cheăng".

Tiô séa ngăn dêi Vi ƀan Khôi túa lĕm tro – Rêh ối pơlê pơla dêi Kuô̆k hô̆i, Dak Lak ai tơmeăm ki kân laga kong pơlê kal môi troăng pêi cheăng ton xŏn, tơdâng tơ’mô ƀă pêi pro păng ‘nâng tâ ‘na mơjiâng mơngế pêi cheăng, ki rơhêng vâ tối cho troăng hơlâ mơhnhôk mơngế ki rơkê, ki má lối cho kuăn pơlê hdroâng kuăn ngo. Tơdrêng amê, kal thăm tơdjêp pơla hngêi trung, khu tê mơdró ƀă khu râ kăn pơkuâ vâ mơjiâng hê̆ sinh thái mơngế pêi cheăng, hnê mơjiâng hlối xúa, kum mơngế hriâm tâp kô chiâng tăng cheăng pêi a pơlê xiâm.
Pôa Đinh Công Sỹ, Phŏ Kăn hnê ngăn Vi ƀan Khôi túa lĕm tro, rêh ối pơlê pơla dêi Kuô̆k hô̆i tối, tơdroăng kố thăm thế pêi thâ tâ, drêng tơdroăng tơmot chiâng môi kong pơlê, cheăm, lôi râ tơring hiăng mot hneăng má mơ’nui. Môi kong pơlê Dak Lak nếo kân rơdâ tâ ƀă hrĭng cheăm ối tung kong pơlê, thăm kal troăng pêi cheăng ton xŏn mơngế pêi cheăng tơtro:
‘’La ngiâ kơpong kân rơdâ môi tiah mê, pin thế ai mâu tơdroăng pơhlêh ‘na mơnhên troăng prôk la ngiâ mâu kơvâ hnê mơjiâng, troăng pêi tung tơring ƀă kong pơlê xuân kal ai hbrâ troăng pêi tung la ngiâ. Má péa cho ki kal ‘na tơdroăng hnê cheăng pêi vâ mơhnhôk tung mâu kơvâ khu tê mơdró dế ai tơdroăng kal vâ kân môi tiah pêi chiâk deăng, cheăng kâ pêt rak kong’’.
Mơjiâng mơngế pêi cheăng, ki rơhêng vâ tối cho mơngế pêi cheăng ki rơkê, ôh tá xê to tơdroăng kal vâ a ngiâ mê ối cho tơdroăng xiâm ăm mơnhông mơdêk krá tơniăn dêi Dak Lak tung la ngiâ. Bu drêng mơngế pêi cheăng châ mơjiâng tro troăng, kong pơlê nếo xúa tâi tâng tơmeăm ki ai hlâu, ki pơxúa ƀă mơ-eăm rơdêi tung tơdroăng pơhlêh nếo ƀă mot tơrŭm.
Viết bình luận