Tiô Pơkâ pêi pro troăng kân pơlá  hơnăm 2021 – 2030, tơmiêt pêi troh hơnăm 2050, troăng kân ăm phêp rơxế kơtâu têi Quảng Ngãi – Kon Tum xŏn 136 km, troăng kân 4 hơlâ troăng rơxế kơtâu, tơdroăng mơ’no liăn hdrối hơnăm 2030. Nôkố khu râ kăn pơkuâ 2 kong pơlê Kon Tum ƀă Quảng Ngãi hiăng hôp ƀă môi tuăn pơkâ Khu xiâm mơjiâng tơmeăm mơjiâng troăng kân ăm phêp rơxế kơtâu têi ƀă tâi tâng kơxô̆ liăn mơ’no liăn cheăng vâ chê 35.400 rơtal liăn, ối tung khu tơdroăng tơkêa bro ki kal tơnêi têa.

Tiô pơkâ, troăng kân ăm phêp rơxế kơtâu têi Quảng Ngãi – Kon Tum prôk tơkâ hluâ 5 tơring, pơlê kong krâm cho pơlê kong krâm Đức Phổ, tơring Ba Tơ (xŏn 58 km ối tung kong pơlê Quảng Ngãi) ƀă 3 tơring cho Kon Plông, Kon Rẫy ƀă pơlê kong kơdrâm Kon Tum (xŏn 78 km ối tung kong pơlê Kon Tum). Troăng kân ăm phêp rơxế kơtâu têi tiô tối hdrối ai 4 hơlâ troăng rơxế, pro ăm rơxế chiâng kơtâu têi sap ing 80 – 100km/chô. Troăng kân ai 9 tíu tơkoh, tơniăn troăng kân prôk troh a mâu troăng ki xiâm, tíu xiâm cheăng kâ, khôi túa lĕm, kal kí tơ’lêi hlâu. Pakĭng mê, troăng kân ăm phêp rơxế kơtâu têi tiô tối hdrối mơjiâng 60 to kông tơkâ ki xiâm, 10 to kông ƀă 3 troăng kân tung kơdâm tơnêi.

Ing pơkâ dêi 2 kong pơlê, nếo achê kố, Khu xiâm mơjiâng tơmeăm hiăng ai pơkâ pơcháu Khu pơkuâ tơdroăng tơkêa bro 85 tơkŭm po pro tơbleăng hriăn plĕng apoăng chiâng pêi pro Tơdroăng tơkêa bro mơ’no liăn mơjiâng pro troăng kân ăm phêp rơxế kơtâu têi Quảng Ngãi – Kon Tum. Khu pơkuâ tơdroăng tơkêa bro 85 hbrâ pêi cheăng ƀă mâu kơ koan, tíu cheăng ki ai tơdjâk vâ pơtối tơdah tâi tâng mâu tơdroăng châ tơƀrê hriăn plĕng hiăng pêi pro vâ pơtối hriăn plĕng, chêh pro tơbleăng pơkâ troăng hơlâ mơ’no liăn pro tơdroăng tơkêa bro, ví bô bối, mơ’nhê tê kơtê.

Pôa Đàm Phúc Tuyên – Phŏ Kăn pơkuâ Khu mơjiâng tơmeăm khoăng kong pơlê Kon Tum, tối ăm ‘nâi: tơdroăng tơkêa bro troăng kân ăm phêp rơxế kơtâu Quảng Ngãi – Kon Tum, krê tơdroăng tăng tơnêi tiô tối hdrối tâi tâng kơxô̆ liăn lối 1.200 rơtal liăn. Péa kong pơlê tơkêa kô xing xoăng tŭm kơxô̆ liăn vâ kêi đeăng tăng tơnêi, pơcháu kum ăm tơdroăng mơjiâng pro tung hơnăm 2026. Peăng kong pơlê Kon Tum hbrâ dâng 650 rơtal liăn ăm tơdroăng tăng tơnêi. Xo vế túa ki rơkê tơtro ing mâu tơdroăng tơkêa bro ki ê, kong pơlê hiăng ‘nâi hdrối mâu tơdroăng pá puât vâ hbrâ po mâu troăng pêi pro tơdroăng tăng tơnêi.

Pôa Đàm Phúc Tuyên tối: Tơdroăng mơjiâng troăng kân ăm phêp rơxế kơtâu Quảng Ngãi – Kon Tum ôh tá xê to kơdroh kơtăn, mơdêk tê mơdró, mê ối cho tơdroăng mơdêk kân vâ Măng Đen châ tơƀrê hluâ pơkâ tung mơnhông ôm hyô. Tâng troăng kân ăm phêp rơxế kơtâu têi châ mơ’no liăn rĕng, kô pro Măng Đen chiâng tíu xiâm ôm hyô ngăn loăng pơlái kong kế kân dêi Tây Nguyên, tơdrêng amê, kum Kon Tum ƀă Quảng Ngãi chiâng tíu ki eăng cheăng kâ dêi kơpong peăng tơdế tơnêi têa – Tây Nguyên.

Tơdrêng amê, troăng kân ăm phêp rơxế kơtâu têi Quảng Ngãi – Kon Tum ối kum mơjiâng troăng klông tơdâng tơ’mô, prôk troh ƀă troăng kân ăm phêp ơxế kơtâu têi tiô troăng Peăng mâ hâi Lo – peăng mâ hâi Luô tơdjêp ƀă troăng kân ăm phêp rơxế kơtâu têi Peăng kơnhŏng – Peăng hdroh; kum kơdroh kơxô̆ liăn pơto ƀă djâ mâu tơmeăm ing uâ pro loăng, pơkeăng, kơxu, mắc ca, kơphế troh kơno tuk Dung Quất tơ’lêi hlâu. Ki rơhêng vâ tối, troăng kân kố ối kum lĕm tro ăm troăng pêi cheăng ton xŏn mơjiâng ƀă gâk kring Tơnêi têa, ƀă kong pơlê Quảng Ngãi, Kon Tum ƀă kơpong Tây Nguyên, peăng tơdế tơnêi têa xuân môi tiah tơdjâk kơpong pái víu mơnhông mơdêk Việt Nam - Lếo – Kul./.