*Klêi kơ’nâi tơdah, xối pleăng Quốc Tổ ƀă leh xối pleăng tiô khôi hmâ a tíu xối tơbâ Âu Lạc a ngo Phượng Hoàng ối tung Kơpong ôm hyô xí Prenn, pơlê kong kơdrâm Đà Lạt, kăn pơkuâ ƀă kuăn pơlê kong pơlê Lâm Đồng rơtế ƀă hên hĭn tơmối hiăng tâp nhang Pôa Xiâm hdroâng hdrê.

Pakĭng tơdroăng ki po rơkâu xối, tơdroăng ki xối tơbâ hâi pơtáu Hùng hlâ hơnăm kố dêi kong pơlê Lâm Đồng ối ai mâu tơdroăng pêi pro mơđah tơbleăng ngê̆ thuât chal krâ, mâu tơdroăng ki xah hêi cơ tươ̆ng, hếo trăng ki vâi bliu rơmâ, pâm hdro tơnêi, po kơchơ kế kâ, tíu ki mơđah tơbleăng chế Việt Nam, chêh chư lĕm tơviah ƀă mơđah tơbleăng um.

*A Dak Lak, Leh xối tơbâ pơtáu Hùng hơnăm 2025 châ tơkŭm po kân krip a Tíu xối tơbâ ton nah dêi tơnêi têa Đình Lạc Giao, pơlê kong kơdrâm Buôn Ma Thuột. Klêi tŏn chêng Rơđế koh hâk dêi khu tŏn chêng buôn ko Tam, Leh xối tơbâ pơtáu Hùng a Dak Lak châ tơkŭm po kân krip ƀă tơdroăng pro leh mơdĭng tiô khôi hmâ ton nah xu khu xối peăng Kơdrâi pêi pro.

Mâu kăn hiăng têk nháng pleăng reăng ƀă têk pleăng tơmeăm, to mâu tơmeăm ki pê lo ing chiâk deăng, tơmeăm tăng lúa ting kong ai tếk a kơƀăng tĭng plăng ăm potáu Hùng, mâu tơmeăm têk pleăng ƀă rơkong pơchuât tơbâ tơdroăng ton tĭn rôh nah ‘na tơplâ khên tơnôu dêi mâu pơtáu rơxông pơxiâm mơjiâng tơnêi têa tơplâ plâ pro tơniăn hdroâng mơngế, lâp tơnêi têa tơrŭm môi. Pôa Nguyễn Tuấn Hà, Phŏ kăn hnê ngăn Vi ƀan kong pơlê Dak Lak teăng mâ mâu kăn, kuăn pơlê mâu hdroâng kuăn ngo tung kong pơlê Dak Lak tơbleăng  hnoăng ăm pơtáu Hùng ‘na mâu hnoăng ki kuăn pơlê hiăng châ pêi pro tung kong pơlê tung mâu hơnăm mê hía nah.

*Tung 2 hâi pơtê mơ’nui măng tĭng ƀă hâi pơtê xối tơbâ pơtáu Hùng hlâ (sap ing hâi má 8 troh 10 khế 3 âm lĭt), lối chât rơpâu ngế tơmối ôm hyô hiăng rah xo kong pơlê Kon Tum cho tíu troh ƀă rơtế ƀă kuăn pơlê a kong pơlê kố tơmiât troh xiâm rêi hdroâng mơngế mơnhông khôi hmâ ki lĕm tro kuăn Lạc cháu Hồng.

Tíu ki tơdah tơmối hên má môi a Kon Tum tung rôh leh xối tơbâ hâi pơtáu Hùng hlâ kố cho pơlê kân Mang Deang, tơring Kon Plông, ƀă vâ chê 20 rơpâu ngế. Pakĭng tơdroăng ki lăm ngăn tơnêi tơníu lĕm krip, châ ngăn mâu khôi túa lĕm tro mâu hdroâng kuăn ngo akố, hên tơmối xuân mơdoh chôu troh a mâu tíu ki rak vế khôi hmâ xối pleăng pơtáu Hùng, môi tiah Đình Lương Khế a pơlê kong kơdrâm Kon Tum, chuô Tháp Kỳ Quang, tơring Đăk Hà, vâ rơtế ƀă kuăn pơlê akố chôu nhang tơbâ troh xiâm rêi hdroâng mơngế.