Hâi mơdĭng túa lĕm tro mâu hdroâng kuăn ngo tung kong pơlê Gia Lai hơnăm 2015 tiô tối hdrối  tơkŭm lối 700 ngê̆ nhân a 17 tơring, pơlê kong krâm ƀă kong kơdrâm tung kong pơlê.  Tung hâi mơdĭng mê ai hên mơngiơk túa lĕm tro hên tơdroăng xah hêi tơbâ tơdroăng hmâ tơkŭm pêi pro tung kuăn pơlê, mơđah ếo putâk, rêi prôa, hlŭm rơvŏng, tŏn chêng, pế kơchên kế kâ tiô khôi hmâ ton nah ƀă xah hêi tiô chal krâ; mâu khu mơdró tơmeăm tê mê cho kơphế, drôu xiâm, tơxông prông, hơ’nêh poh pheăng... veăng  tơbleăng hên tơmeăm ƀă hên túa lĕm tro dêi kuăn pơlê mâu hdroâng kuăn ngo tung kong pơlê.

Ngê̆ nhân Nay Ka ối a Bon Phu Ama Nhuer 2, cheăm Ia Rtô pơlê kong krâm Ayun Pa ăm ‘nâi: Hơnăm kố, khu ngê̆ nhân pơlê kong krâm Ayun Pa mê ai 46 ngế kô veăng pêi  hên tơdroăng  mơđah tŏn chêng, teăn hmôu jêa, veăng xah hêi  tio chal krâ nah.