Hlá tơmong ki kơbâng ga chêk, drêng kâ kô tâ lĕm rơmuăn ƀă chía vâ rơngiâp. Vâi krâ-nhŏng o, maluâ vâi jâ, vâi nôu, vâi nâ o hmâ lăm hnêi xo hlá tơmong ki kơbâng mê vâ kâ drêh, hơkĕm kâ ƀă mâu kơchâi, lơ hơ-iu ƀă măm nêm, măm ruôk. Hlá tơmong kơbâng vâi hmâ pro kơchâi kâ ki kâ tơvât, hơ’lâk ƀă ká, pêi ƀă ká măm khăng lơ ká âp ki hiăng tơvât ƀă po, têng khăng. Nâ H’Lop Niê, ối a ƀuôn Sah B, cheăm Ea Tul, tơring Čư̆ Mgar, kong pơlê Dak Lak ai tối tiah kố:

 “Hlá loăng tơmong kố ga kơhiâm ‘nâng, tơtro ƀă roh kâ hmê ki tôu. Kố cho kơchâi ki pêi tơvât ká âp ƀă hlá loăng tơmong ki kơbâng. Drêng rôe ká âp mê, vâi pa tơdế, tah lôi kơxêng ƀă ko ga, hlá loăng tơmong mê vâi hmâ lăm kêi a chiâk deăng, klêi mê, vâi kêi djâ vêh a hngêi, vâi pêi ƀă hăng, po, hăng, kơtĕm xâk. Kế kâ ki kố vâi hmâ pro tung pơla kâ hmê rêm hâi dêi mơngế Rơđế ƀă vâi krâ hiăng hmâ pêi pro ing ton hdrối nah”.

Drêng mâ hâi hiăng pơxiâm lo a rŏng ngo, mơngế Rơđế hiăng hbrâ dêi tơmeăm lo lăm a chiâk a deăng. Pakĭng pô mâu pong, chêa ki hngăm xua tâ mâu plôi têa, vâi xuân hiăng hbrâ tâ tơvế mâu kế kâ ki tiah hmâ, tơ’lêi, la kơchâi kâ ki kố xuân cho tơmeăm ki kơhiâm rêm hâi. Hlá loăng tơmong ki kơbâng mê vâi hmâ pêi ká âp, cho kế kâ ki kơhiâm tiah mê. Ká âp ki pêi ƀă hlá loăng tơmong mê vâi hmâ kâ ƀă hmê dế ối tôu ƀă kơchâi drêh, chiâng kế kâ ki kơhiâm, tơviah, la hơ-iâ ‘nâng.

Nâ H’Đô Niê, ối a ƀuôn Sah B, cheăm Ea Tul, tơring Čư̆ Mgar, kong pơlê Dak Lak ai tối, túa ki pêi tơvât ká âp ƀă hlá loăng tơmong kố ga tơ’lêi tăng, tơ’lêi bro, la tâng vâ kơchâi ki kố kơhiâm lĕm khât mê kal ai tơdroăng ki rơkê plĕng, ki rơhí rơhó dêi mơngế ki pế, pêi, bro kơchâi ki mê.

“Hlá loăng tơmong kơbâng drêng lăm kêi a rơnó kố cho kơhiâm ‘nâng, tâng ai kong mêi ah ga ôh tá hơ-iâ xếo, hlá tơmong ki krâ, ôh tá rơmuăn, kơbâng xếo. Hlá loăng tơmong kố ga cho xua lăm hnêi xo tung kong, xuân ai mâ rơpŏng ki ‘nâ vâi ối pêt loăng tơmong tâ tá kơdrum hngêi, lơ lăm hnêi xo a chiâk, lơ tung kong. Ká mê, vâi krâ, nhŏng o ai drêng vâi lăm tăng hlâm, kât kruăn, xế a têa kroăng, têa long, djâ ká ki mê djâ vêh a hngêi, xuân ai mâu ‘nâ vâi lăm rôe ká a hngêi kơchơ”.

Ká âp pêi tơvât ƀă hlá loăng tơmong cho kế kâ ki kơhiâm, tơviah má môi tung mâu túa kế kâ dêi mơngế Rơđế, mơhno tối tơdroăng ki rơkê plĕng tung mơjiâng pro kế kâ. Kế kâ kố hmâ kâ tung rêm roh kâ hmê tung rơpŏng hngêi, lơ mâu roh leh mơdĭng dêi pơlê, Ki malối, a khế 3, drêng hyôh kong prâi a Tây Nguyên dế mot tung rơnó hơngui, kế kâ kố ôh ta păng lôi, vâ mơhno tối tơmeăm ki chiâng xêh tung kong, tơdroăng ki tơrŭm tung pơlê pơla ƀă hâk nhoăm hlá nhâ, loăng kong ki hiăng pơtroh ăm kuăn pơlê châ kâ xúa ƀă rêh ối.