A plông hngêi trung râ má péa Nguyễn Văn Cừ, pơlê kong kơdrâm Ƀuôn Ma Thuột, kong pơlê Dak Lak, mâu vâi o hok tro hơniâp ro ƀă mâu tơdroăng ki xah hrot kơxái, trut loăng, klup mâ rup pu pái. O Nguyễn Việt Hùng, hok tro lâm 8B, ăm ‘nâi, kố ôh ti xê cho mâu tơdroăng xah mê ối cho tơdroăng pêi tung rôh tí tăng ‘nâi ‘nâ xiâm rêi hdroâng mơngế, xua hngêi trung tơkŭm po rôh tơbâ hâi pơtáu Hùng hlâ:

"Ing tơdroăng ki á hâk tơngăm ‘na khôi hmâ dêi hdroâng mơngế ƀă xuân ăm o hlo tơ’nôm hên ki hlê plĕng ‘na khôi hmâ. Á mơnê ‘na hnoăng cheăng mơjiâng tơnêi têa dêi pơtáu Hùng. Cho môi ngế hok tro mê á kal hriâm tâp kơhnâ vâ ôh tá pro ăm mâu thái cô ƀă nôu pâ khéa ƀă tơxâng ƀă inâi cho muăn loi Pôa Hồ”.

Ƀă o Trần Văn Bảo hok tro hriâm rơtế tung lâm mê hlo tơdroăng ki hơniâp ro ƀă ƀai hriâm pơxúa sap ing tơdroăng pro pơro “vâi pro xêh mơđah xêh” dêi mâu vâi o tung lâm ‘na tơdroăng hơ’muăn khoh ai kơƀăn chưng, kơƀan dày”.

“Mâu vâi o mơđah gá ro khât, á hâk vâ má môi cho rôh mơđah ‘na pro pơro hơ’muăn khoh ai kơƀăn chưng, kơƀan dày. Tơdroăng pơro mê gá pơxúa khât ƀă tơtro pro pơxúa hên ki hlê plĕng pơxúa ‘na tơdroăng ton nah. Á xuân châ hriâm ƀai hriâm cho ngin mơ-eăm hriâm tâp rơkê vâ mơ-eăm mơjiâng ƀă veăng gum ƀlêi chiâng kuăn pơlê ki ai pơxúa ăm pơlê pơla”.

Sap ing apoăng khế 3 âm lĭt, thái cô ƀă hok tro hngêi trung râ má péa Nguyễn Văn Cừ hiăng kơhnâ hriâm tâp mâu ƀai hơdruê xuăng vâ veăng tung rôh ki po pa kong chôu hriâm tiah hmâ. Ƀă inâi “Dòng máu Lạc Hồng” tơdroăng ki hriâm pro pa kong rôh kố tơmiât troh hâi tơbâ pơtáu Hùng hlâ (10/3 âm lịch). Cô Vũ Thị Thu Hằng, tôh trưởng tôh Lịch sở-Địa lý-Giáo dục công dân dêi hngêi trung tối: Ôh ti xê to môi tơdroăng ki pêi pro tiah hmâ ngin rơhêng vâ gok tro hlo nhên ‘na ki pơxúa dêi hâi tơbâ pơtáu Hùng hlâ, vâ mâu vâi o hlê hiâm mơno pâ nhuô̆m tơnêi têa ôh ti xê mơhno tối ing rơkong tơpui mê ối ing túa ki pêi pro nhên.

 “A rôh ki pro dòng máu Lạc Hồng, tôh hiăng tơmiât pro ăm vâi o tăng ‘nâi, klêi mê tăng mâu ƀai hơdruê tối ‘na chal nôu Âu Cơ, Lạc Long quân vâ ăm mâu vâi pú pro pơro hơniâp ro cho tơdroăng ki khoh ai kơƀăn chưng, kơƀăn dày dêi chal pơtáu Hùng, tối ‘na tơdroăng pơtáu Hùng pơtó hnoăng ăm Lang Liêu, tơdroăng ki hrĭng kơtâ xêi hrĭng to kuăn ƀă môi tơdroăng ki kơxoăng dêi mâu vâi po. Sap ing mâu tơdroăng kố gum vâi o tăng mâu tơdroăng ki xah hêi chal krâ dêi mâu kơpong vâ mơjiâng pro mâu tơdroăng ăm gá hơniâp ro”.

Vâ gum hok tro châ ‘nâi châ hlo tơdroăng ton nah môi túa ki rơkê tơtro, hngêi trung xuân hiăng tơkŭm po rôh tơ’noăng tăng ‘nâi ‘na chal pơtáu Hùng Vương, tơ’mot hên kơdrâm hok tro veăng. Mâu vâi o châ klâ tiô khu vâ tiâ mâu rơkong kơ-êng ‘na tơdroăng ton nah, túa lĕm tro ƀă hơ’muăn tơdjâk troh pơtáu Hùng. Rơtế amê, mâu lâm ối hbrâ rơnáu mâu ƀai hơdruê xuăng vêh mơhno mâu khôi hmâ ki châ ô eăng môi tiah: Sơn Tinh – Thủy Tinh; Tơdroăng ki ai kơƀăn chưng, kơƀăn dày ƀă hên ki ê.

Ing mê, gum mâu vâi o ai troăng ngăn tơtro tâ ƀă hlê trâu tâ ‘na tơdroăng ton nah hdroâng mơngế. O Nguyễn Hoàng Nam, hok tro lâm 8C, hngêi trung râ má péa Nguyễn Văn Cừ, hâk tơngăm tối:

 “Á pro ngế pơtáu Đệ Nhị tung rôh ki pro pơro ‘na truyền thuyết kơƀăn chưng, kơƀan dày. Ing tơdroăng kố, á hlo ki pơxúa cho tơdroăng ki pơtáu Hùng hiăng pơtó hnoăng ăm Lang Liêu xua gá rơkê, hiâm mơno lĕm, rế ai hiâm mơno hlê plĕng kơ nôu pâ ƀă rế rơkê tung pêi cheăng. Ing mê, mơdêk hiâm mơno tơmiât pêi rơkê tung pêi cheăng dêi kuăn pơlê Việt Nam. Á xuân hâk tơngăm ‘na khôi hmâ dêi hdroâng mơngế pin tâ”.

Tiô pôa Nguyễn Văn Lợi, phŏ ngế pơkuâ Hngêi trung râ má péa Nguyễn Văn Cừ, pơlê kong kơdrâm Ƀuôn Ma Thuột, kong pơlê Dak Lak, tơdroăng ki hnê tơdroăng ton nah xuân môi tiah hnê khôi hmâ dêi mâu hngêi trung nôkố gá hên. Pakĭng pơloăng mơnúa khôi hmâ cho lăm leh, chôu nhăng a tíu xối tơbâ Pơtáu Hùng, tung pơla nôkố ai hên túa pêi gum hok tro pêi pro vâ hlê ‘na xiâm rêi dêi hdroâng mơngế.

“Hnê mâu vâi o tơmiât troh xiâm rêi, ‘nâi mơheăm chhá Lạc Hồng ƀă hnê ăm mâu vâi o nhên ‘na hiâm mơno ‘nâi mơnê pôa pâ pin hiăng ai hnoăng mơjiâng ƀă rak vế ƀă vâ ăm mâu vâi o hlo hnoăng dêi tơná mơjiâng tơnêi têa. Tơdroăng hnê kố tơkâ luâ plâ rơxông, pro ăm mâu vâi o hâk vâ, hơniâp ro, pro chiâng tơdroăng ki hơniâp ro drêng mâu vâi o troh hngêi trung “.

Ing tơdroăng ki hriâm pa gong, ƀă túa pêi tơkŭm po hên ôh ti xê to gum hok tro Dak Lak hlê tơ’nôm ‘na tơdroăng ton nah la ối hriâm pât túa pêi cheăng khu, hiâm mơno tơrŭm ƀă hiâm mơno ‘nâi mơnê ƀă xiâm rêi hdroâng mơngế. Kố cho mâu tơdroăng ki kơnía gum vâi o păn roăng hiâm mơno pâ nhuô̆m tơnêi têa, pơtối pơtó khôi hmâ “ôu têa pâ kơnhŏng” dêi hdroâng mơngế Việt Nam.