Troăng kân 1 dêi kong pơlê Dak Nông, pơla troăng  tơkâ luâ thôn 3, cheăm Quảng Tâm, tơring Tuy Đức, hlo hên tíu kơhlong kơhlâ ki kân ‘nâ xŏn châ péa pái met têa tung chêng rơxế. A hên tíu ki ‘nâ chá ôk a troăng hiăng tơlêa tâi tâng, hlo to hmốu  kế ki ‘nhíu. Rêm rôh rơxế prôk luâ, kơtâng kơlung kơlăng pro kuăn pơlê ki ối péa pâ troăng thế mơgât dêi hiâm xâu tro hrik kơtâk.  Pôa Trương Anh Bằng, ngế pơkuâ hngêi tế mơdró  kâ ôu a Quảng tân, ăm ‘nâi, troăng tơ’nhiê hiăng hên hơnăm kố. Mơhé rêm hơnăm xuân châ ‘mâi rơnêu pro, la klêi pro xâo to lâi khế hiăng tơ’nhiê nếo.

"Hngêi a tê kế kâ a kố thế klĭng péa mâu kơtuh vâ kơtâk pôi tá mot tung kế kâ. Kơƀăng tăng thế xut pơlĕm 2-3 hdrôh rêm hâi la xuân ôh tá krúa. Hên mâu nôu pâ chơ dêi kuăn tơkâ luâ akố tro kơtong kơbrô kơbrâ hmân ếo. Mâu vâi muăn lăm hriâm tro kơtong to trâp kơbrô  há. A thế ‘măn kơxô têa a kố vâ mâu vâi muăn kuăn cháu ƀă mâu nôu pâ ki chơ chiên dêi kuăn  xếo dêi chêng kŏng. Vâi hiăng ‘mâi rơnêu pro la troăng xuân ối tơ’nhiê, tơnêi kơtâk tê''.

Troăng kân 1 a Dak Nông hiăng tơ’nhiê ó ôh tá xê to tơdjâk troh tơdroăng mơdró ƀă drêng kuăn pơlê tơkŭm hôp, drêng ai tơdroăng xah hêi mê ối pro ăm mâu rơxế kơtâu rĕng tơ’nhiê, tung pơla chơ tơmeăm ton hâi  tâ ƀă mơ’hrê hên têa châu, têa kơxă, pro rế tâk kơxô̆ liăn rơxế kơtâu. Ngoh Nguyễn Kim Toàn môi ngế vê rơxế  mơnúa riên ngăn:

“A prôk ing Quảng Tân mot a Dăk R’tih  lơ prôk mot a mâu cheăm ki ê pĕng tung tá, nôkố hâi chôu tâk luâ tâ 2-3 hdrôh tâng vâ pơchông ƀă hdrối nah. Hdrối nah, a bú prôk tâi 3-4 lit têa châu, la nôkố tâi 9-10 lit têa châu. Hdrối nah, troăng prôk lĕm, pơ’lêh chêng rơxê  bú ‘nâng 1 hơnăm tơdế môi hdroh, nôkố thế pơ’lêh kơtôu chêng rơxế 7- 8 khế môi hdroh” .

Troăng kân 1 cho troăng kâ xiâm, tơdjêp ƀă tơring Tuy Đức ƀă tơring Dak R’lâp, tơdjêp ƀă troăng Hồ Chí Minh ƀă troăng kân 14C, tơdrêng ƀă bo cheăng tê mơdró kăng kong Bu Prăng prôk kĕn kong têa kul, troăng rơxế kơtâu chơ tơmeăm, mơnhông cheăng kâ - rêh ối pơlê pơla ƀă tơniăn kring gak cheăng lêng kơpong tơkăng kong Tuy Đức. Ki xiâm chiâng rĕng tơ’nhiê troăng kân mê cho hên rơxế kân kơtâu chơ hngăm, rơxế chơ tơmối kơtâu rế tâk hên tung mâu hơnăm kô hía nah, tung pơla mê, tơdroăng ‘mâi rơnêu pro rêm hơnăm rế kơdroh.

Pôa Dương Huy Toàn, Kăn hnê ngăn Đảng tơring Tuy Đức, ăm ‘nâi, tơring hiăng pơtroh hlá mơ-éa ăm Vi ƀan kuăn pơlê kong pơlê Dak Nông ƀă Khu xiâm mơjiâng tơmeăm khoăng pơkâ thế xoăng ăm liăn vâ ‘mâi rơnêu, pro nếo troăng a tíu hiăng tơ’nhiê. Nôkố pơkâ thế hiăng châ kĭ ƀă dế tơkôm pro hlá mơ-éa pơtối.

“Kong pơlê hiăng tăng ‘nâi plĕng pơ’lêh mâu kơxô̆ liăn  ing Xiâm tơnêi têa vâ tơbleăng mơjiâng pro troăng kân kô. ‘Na troăng hơlâ ƀă xiâm liăn, pro hlá mơ-éa dế châ tơbleăng vâ  tối hdrối kô châ mơjiâng pro ‘mâi rơnêu troăng a hơ’nui hơnăm kố” ./.