Tung plâ 4 hơnăm, kong pơlê Dak Lak hiăng mơ’no liăn ngân châ lối 2.100 rơtal liăn pêi pro tơdroăng cheăng. Mơhế hên tơdroăng tơvâ tơvân, la tơdroăng kố hiăng pêi hlo tơƀrê, kơdroh châ tơdế kơxô̆ rơpŏng kơtiê tung kơpong hdroâng kuăn ngo, chu ối 13,7% a mơ’nui hơnăm 2024. Dak Lak hiăng kum lối 1.000 rơpŏng pro hngêi ối; ‘no liăn pro nếo ƀă ‘mâi rơnêu pro vâ chê 550 tơmeăm khoăng ki kal; tơkŭm po chât to lâm hnê mâu ngế ki ôh tá ‘nâi chư, hnê cheăng pêi, mơnhông pêi chiâk ƀă ‘mâi mơnhông ki pơxúa túa lĕm tro.

Kong pơlê pâ thế Chin phuh rĕng xoăng liăn ‘no mơjiâng tơmeăm khoăng ki hâi tŭm tiô pơkâ, séa ngăn mơdêk kơlo kơjo kum tơnêi, hngêi ối, tơnêi pêi kâ, têa ôu kâ hum roh tơtro ăm kuăn pơlê. Dak Lak xuân pơkâ thế ‘mâi hơ’lêh luât pơkâ ăm mung hlối tơkŭm ƀă tơdroăng pêi pro pơla pơkâ tơnêi têa vâ mơnhông tơbrê.