Sap ing hơnăm 2022 troh tâi khế 6 hơnăm kố, Kuô̆k hô̆i hiăng pơkâ kdroh 2% nâp hnoăng liăn mơhá ki khá kơnâ ƀă mâu khu tơmeăm, tê mơdró dế châ xúa a kơlo nâp hnoăng liăn mơhá ki khá kơnâ 10% (ối 8%). Vâ mơdêk mơjiâng pro, tê mơdró, mơhnhôk roê xúa, pơkâ pêi tâk châ 8% tơngi klêng, Chin phuh pơtối pơtroh ăm Kuô̆k hô̆i kơxop hlá mơ-éa Pơkâ dêi Kuô̆k hô̆i ‘na kơdroh nâp hnoăng liăn mơhá ki khá kơnâ ăm 6 khế mơ’nui hơnăm 2025 ƀă tá hơnăm 2026.

Ki nhên po rơdâ mâu khu tơmeăm châ kơdroh 2% nâp hnoăng liăn mơhá ki khá kơnâ ƀă mâu tơmeăm, tê mơdró kong ngê̆ thong tin, tơmeăm pro ing meăm, kơchâ, têa rơmâ ki pro, tơmeăm trếo pơkeăng, kơchâ a tơdroăng ki roê ‘mot ƀă kơchâ ki tê ăm khu mơdró kâ tê mơdró, têa kơxăng, têa châu. Ôh tá kơdroh nâp hnoăng liăn mơhá ki khá kơnâ ƀă mâu khu tơmeăm, tơdroăng tê mơdró: Hyôh phôn, liăn ngân, hngêi rak liăn, chư̆ng khoăn, ƀaoh hiêm, tê mơdró hngêi trăng tơnêi tíu, tơmeăm pro ing meăm, tơmeăm chiâ xo ing tơnêi (ôh tá riân kơchâ), tơmeăm ƀă kế tơmeăm, tê mơdró chiu nâp hnoăng liăn mơhá ‘na tê (ôh tá riân têa kơxăng, têa châu).

Môi tuăn ƀă pơkâ mơ’no kố, mâu ngế cheăng tung Vi ƀan pơkuâ Kuô̆k hô̆i pơkâ thế kal mơnhên tối nhên tâ tơdjâk dêi troăng hơlâ tŏng gum. Pôa Phan Văn Mãi, Kăn pơkuâ Vi ƀan cheăng kâ ƀă liăn ngân pơkâ thế:

"Sap ing tơdroăng kơdĭng klâ xoăng kơ koan cheăng dêi pin ƀă athế pêi mâu hnoăng cheăng ki hrê. Pêi mâu troăng hơlâ tŏng gum mê pơkâ thế Chin phuh mơnhên tối tơdroăng ki ai trâm tơ’nôm ‘na nâp, hrê kố vâ riân tâi tâng xing xoăng tơ’mô liăn ngân”.

Tơpui tối leăng pro nhên tơ’nôm, pôa Hồ Đức Phớc, Phŏ Ngế pro xiâm hnê ngăn Chin phuh ăm ‘nâi:

Ƀă tơdroăng Pơkâ kố kô kơdroh nâp hnoăng liăn mơhá lối 232 rơpâu rơtal tung hơnăm kố. Chin phuh kô pêi pro kơtăng, ai túa pơkâ nâp vâ rak tơniăn tơdâng tơ’mô liăn ngân. Hơnăm kố mê tơdroăng ki ăm kâ liăn khế ƀă mâu ngế ki hiăng pơtê ƀă kơdroh ‘mot tơkŭm kơ koan cheăng tơnêi têa in dế xo tung kơxô̆ liăn ‘măn kơdĭng liăn khế tơdrêng amê hlối hrê ing liăn ngân”.

Tiô kơxop hlá mơ-éa, tung pơla xúa tơdroăng Pơkâ sap ing hâi lơ 1/7/2025 troh tâi hâi lơ 31/12/2026. Xuân a rôh hôp 44, Vi ƀan pơkuâ Kuô̆k hô̆i hiăng ăm rơkong tơpui tối ‘na ‘mâi pơhlêh, ‘mot tơ’nôm pơkâ ‘na Tơdroăng pơkâ pêi dêi hneăng hôp Kuô̆k hô̆i. Tơdroăng kố cho vâ rak tơniăn tơ’mô ƀă khu tơrŭm kơ koan cheăng dêi Kuô̆k hô̆i klêi kơ’nâi ‘mot tơkŭm klâ xoăng mâu pơkâ a mâu luât nếo pơkâ, pơtối mơdêk ki rơkê tung tơdroăng cheăng dêi Kuô̆k hô̆i tung hneăng ki nếo.

Tiah mê, mâu kơxop hlá mơ-éa pơkâ, tối tơbleăng pơtroh tơpui tối leăng, tơmâng xo, ‘mâi pơhlêh kơxop hlá mơ-éa luât, kơxop hlá mơ-éa pơkâ pơtroh ăm Kuô̆k hô̆i tơbleăng ƀă mơ’no mâu tơdroăng ki ối ai rơkong tơpui tối phá dêi rơpó kô pơtroh ăm kăn Kuô̆k hô̆i hriăn ngăn hrá má môi cho 48 chôu hdrối po rôh hôp têk kŏng tơbleăng,tâk péa xôh pơkâ nôkố. Kơxop hlá mơ-éa xuân pơkâ chôu ăm rêm ngế kăn Kuô̆k hô̆i tơpui rôh má môi ôh tá luâ 5 phut, rôh má péa ôh tá luâ 2 phut. Kơxop hlá mơ-éa pơkâ chôu rêm rôh tơpui tối leăng dêi kơ koan, khu tơrŭm, ngế ki ai pơkuâ ôh tá luâ 15 phut. A rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên:

Thăm mơnhông ki tơdrăng. Má péa, á hlo athế mơdêk ki rơkê tung tơpui, pơkâ chôu, ví tơpui hên hĭn, rak tơniăn ăm rêm ngế tơpui pơrá tơkŭm tung tơdroăng ki kal. Xua mê mơhnhôk mâu kăn tơpui la athế hbrâ rơnáu nhên, thăm nếo ƀai mê chiâng vâ pơtroh ăm Khu chêh tôm xo rơkong hdrối vâ ai chôu chêh tơkŭm. Má péa nếo, Kuô̆k hô̆i pro tiah lâi la ngiâ ah cho thăm mơdêk tơrŭm tơpui ƀă kuăn pơlê. Tung Kuô̆k hô̆i kơxô̆ cho pin athế ai tơmiât troh tơdroăng kố".