Ngoh Rơ Châm Dun, 30 hơnăm, (mơngế Jarai, ối a pơlê Ngol Rông, cheăm Ia Krêl, tơring Đức Cơ) châ Kŏng ti 74, Ƀinh đoân 15 tơring xo pro kŏng nhân kúa chhá kơxu sap ing apoăng hơnăm kố. Ngoh ăm ‘nâi, ƀă kơlo liăn khế kâ 7 rơtuh tung môi khế, ngoh hiăng ai tơdroăng rêh ối tơniăn tâ.

“Hdrối mot pro kŏng nhân mê rơpŏng hngêi á xơpá khât, nôkố hiăng ai hngêi ối, ai cheăng pêi mê á xuân rơhêng vâ châ tơniăn, xo ah hmối kuăn ‘nĕng châ hriâm tâp, á mơnê kŏng ti hiăng gum á”.

Vâ pêi pro tro tơdroăng cheăng mơnhông cheăng kâ tro ƀă ‘mâi mơnhông cheăng lêng – gâk kring hơnăm 2025 ƀă mâu hơnăm ki pơtối, Ƀinh đoàn 15 kal rah xo 1.489 ngế pêi cheăng a kong pơlê Gia Lai. A tơring tơkăng kong Đức Cơ, ai Kŏng ti 74, Kŏng ti 75, ối tung Ƀinh đoàn 15. Tung mâu hơnăm hdrối mê hía nah hiăng hnê ăm vâ chê 2.000 ngế ki kúa chhá kơxu cho hdroâng kuăn ngo a kong pơlê. Đăi tă Trịnh Hà Tâm, Kăn pơkuâ Kŏng ti 75 tối ‘na tơdroăng tăng cheăng pêi ăm kuăn pơlê a kong pơlê:

“Kŏng ti 75 hiăng xo tŭm ngế pêi cheăng, tâi tâng cho mâu ngế pêi cheăng a kong pơlê. Drêng hnê tơ’nôm mê á tŏng gum vâi tâi tâng mâu pơkeăng môi tiah gum ăm vâi sap ing kơxê vâ vâi hriâm ƀă hnê vâi túa ki pêi xua athế ai túa pơkâ kih thuât ƀă krâu, xua mê khu ki tŏng gum ƀă mâu kăn ƀô̆ đi đo râng kŏng hnê tơdroăng cheăng rơtế ƀă 3 ƀă mâu ngế pêi cheăng”.

Đăi tă Khuất Bá Cao, kăn pơkuâ ngăn Đảng ủi, phŏ kăn pơkuâ ngăn Ƀinh đoân 15, tối nhên, tíu pêi cheăng kố đi đo kơjo gum rah xo mâu ngế pêi cheăng cho hdroâng kuăn ngo akố mot pro kŏng nhân; kố cho môi troăng pơkâ ki kal dêi Đảng ủi, Khu pơkuâ ngăn lêng Ƀinh đoàn 15. Ing mê, veăng gum mơnhông cheăng kâ, mơdêk tơdroăng rêh ối ăm kuăn pơlê, rak vế krá, gâk kring tơniăn tơdroăng kal kí, tơniăn tung pơlê pơla kơpong tơkăng kong. Đăi tă Khuất Bá Cao tối rơdêi:

“Vâ chê 8.000 ngế hdroâng kuăn ngo dêi Ƀinh đoân châ ngin tơmâng ngăn tŏng gum. Ngin hiăng hnê mơhno mâu tíu pêi cheăng dêi ƀinh đoân tơmâng ngăn tŏng gum, hnê mơdêk ki rơkê plĕng xuân môi tiah kơjo gum mơdêk rơdêi tơdroăng ki rah xo mâu ngế pêi cheăng cho hdroâng kuăn ngo mot pro kŏng nhân a mâu tíu pêi cheăng vâ rak tơniăn ‘na kơxô̆ liăn pêi lo, tơdroăng rêh kâ ối ăm vâi krâ nhŏng o ing hên kơxô̆ liăn, troăng hơlâ vâ tŏng gum vâi krâ nhŏng o ‘na tơdroăng kế tơmeăm ƀă kế xúa, rơxế kơto, kih thuât, hdrê pêt, kơxô̆ liăn pêi cheăng. Kơhnâ hnê tối mơhnhôk vâi krâ nhŏng o pêi cheăng kâ, pêi cheăng rơkê”.

Tung 40 hơnăm hdrối nah, a kơpong peăng Kơnhŏng Tây Nguyên, Ƀinh đoàn 15, pêi pro péa hnoăng cheăng ƀă tơdroăng cheăng lêng. Nôkố tíu pêi cheăng ối pơkuâ ngăn lối 44.295 ha kơxu ƀă vâ chê 400 ha báu, prá alâi, rơtế ƀă 6 toăng hngêi kơmău uâ pơliê chhá kơxu ƀă châ 55.000 tâ̆n tung môi hơnăm. Ƀinh đoàn hiăng veăng gum lối 2.800 rơtal liăn ăm hngêi rak liăn tơnêi têa, tăng cheăng pêi tơniăn ăm lối 16 rơpâu ngế pêi cheăng, tung mê lối 60% cho kuăn pơlê hdroâng kuăn ngo. Túa “tơrŭm rơpŏng” pơla kŏng nhân ƀă mơngế Xuăn ƀă hdroâng kuăn ngo ƀă lối 4.200 rơpŏng, veăng gum rak tơniăn tơrŭm, mơdêk tơdroăng rêh ối kuăn pơlê. Pôa Rơ Châm Chich, krâ pơlê, a pơlê Beng, cheăm tơkăng kong Ia Chía, tơring Ia Grai, kong pơlê Gia Lai ăm ‘nâi, kơnôm ing troăng pơkâ dêi Ƀinh đoân 15 rah xo mot pro kŏng nhân mê tơdroăng rêh ối dêi vâi krâ kuăn pơlê châ mơdêk khât.

"Ƀinh đoân 15 pêt môi kơpong kơxu, kơphế a tíu tơkăng kong Ia Grai, Čư̆ Prông, Đức Cơ, tơdroăng rêh ối dêi vâi krâ nhŏng o hiăng hlo mơnhông khât. Krê pơlê á ai 200 ngế Jarai pro kŏng nhân. Malối cho Kŏng ti vâi tơmâng ngăn khât troh mâu rơpŏng tơrŭm, hnê pêt ƀă rak ngăn kơdrum deăng, pêt báu klâng. Kơlo rêh ối dêi vâi krâ nhŏng o hiăng pơhlêh khât”.

Ƀinh đoân 15 hiăng pêi pro tro hnoăng cheăng hnê mơhnhôk, veăng gum pêi pro tro hnoăng cheăng lêng gâk kring, rak vế tơniăn a kơpong tơkăng kong mâu kong pơlê Gia Lai, Kon Tum. Ƀinh đoân hiăng tăng cheăng pêi tơniăn ăm 9 rơpâu ngế pêi cheăng cho hdroâng kuăn ngo; tơkŭm po lối 4.200 rơpŏng kŏng nhân mơngế Xuăn ƀă hdroâng kuăn ngo tơrŭm, tŏng gum dêi rơpó mơnhông cheăng kâ.

Tơdroăng tŏng gum cheăng kâ ăm kŏng nhân, malối cho kŏng nhân mơngế hdroâng kuăn ngo, ôh ti xê pơtê to a troăng hơlâ tăng cheăng ƀă pêi lo liăn, mê ối cho tơdroăng cheăng ki ton tơrŭm pơla khu mơdró kâ, khu kăn pơkuâ ƀă kuăn pơlê. Mâu tơdroăng cheăng pêi pro nhên, ai pơxúa dêi Ƀinh đoân 15 tung hên hơnăm hdrối cho mơhno ăm hiâm mơno pôu râng, xua pơlê pơla – xua tơdroăng mơnhông krá tơniăn dêi kơpong tơkăng kong Tây Nguyên.