A chôu phut trâm mâ, pôa Trần Thanh Mẫn, Kăn xiâm hnê ngăn Kuô̆k hô̆i hiăng tối pơtâng ăm kuăn pơlê ‘na mâu tơdroăng ki kal ƀă hâi khế ki po Roh hôp má 9, Kuô̆k hô̆i hneăng 15; mâu troăng tơdjâ dêi Đảng ‘na hnoăng cheăng kăch măng ki rah xo iâ mơngế pro pơkuâ dêi khu cheăng kal kí. Roh hôp tiô tối hdrối kô po sap ing hâi lơ 5/5 troh lơ 30/6, séa mơnhên ngăn, tối tơbleăng lối 30 tơdroăng pơkâ ‘na Luât, 20 tơdroăng ki chêh tối ‘na tơdroăng pơkâ. Tung mê, ki kal xiâm má môi cho ‘mâi rơnêu 8 tơdroăng dêi Luât hơnăm 2013 vâ pêi pro tơdroăng ki ‘mâi rơnêu, pơhlêh, rah xo iâ mơngế kăn pơkuâ.

Pôa Trần Thanh Mẫn tối nhên, kố cho roh cheăng pơhlêh ki kân, ki nếo vâ rah xo iâ mơngế pơkuâ, khŏm rak tơniăn ki châ tơƀrê, ai pơxúa, dâi khât, tŏng gum kuăn pơlê. Hdrối mê, drêng koh tơbâ 50 hơnăm hâi châ tơleăng lĕm pêa Hdroh, pro tơnêi têa tơrŭm chiâng môi, pôa Trần Thanh Mẫn hiăng lăm pôu, hbru tơmeăm ăm Jâ Nôu Việt Nam khên tơnôu; lăm pôu, hbru tơmeăm ăm 50 rơpŏng ki lăm pro kăch măng nah, mơngế ki ai hnoăng tơnêi têa a pơlê kong kơdrâm Vị Thanh, kong pơlê Hậu Giang.