A chôu phut trâm mâ, hên kuăn pơlê tôu tuăn xâu lơ klêi kơ’nâi tơ’mot 3 kong pơlê ah, mê kô chiâng ai kơdrâm kăn ƀô̆ dêi 2 kong pơlê Dak Nông prế Bình Thuận kô tơkŭm cheăng a tíu xiâm dêi pơlê kong kơdrâm Đà Lạt, kong pơlê Lâm Đồng vâ pêi cheăng. Pakĭng pá puât tung tơdroăng prôk lăm, tơdroăng ki tŏng gum ăm ‘na tíu kâ koi, ối, pơtê cho tơdroăng ki pá puât kân.

Tơdrêng ƀă tơdroăng pâ thế kong pơlê kal ai troăng hơlâ ki tŏng gum tơniăn lĕm ăm mâu tơdroăng mê, kuăn pơlê Lâm Đồng ối pâ thế pơtối tŏng gum tơplâ mơdât khu ngế kâ kơluâ, kâ kơhveăm, mơdât tơdroăng tê mâu tơmeăm pơloi, kế ki ôh tá dâi khât ƀă hên hĕng mâu tơdroăng ki ê. Hâk kơdeăn mâu rơkong tơpui tối, pâ thế ƀă veăng hnê tối dêi kuăn pơlê, pôa Phan Đình Trạc vêh mơnhên, tơdroăng cheăng tơplâ mơdât kâ kơluâ, kâ kơhveăm, tơplâ mơdât ƀă tơdroăng pro xôi tung mâu khế hơnăm hdrối mê hía nah hiăng châ pêi pro tro, hiăng chiâng tơdroăng ki tiah hmâ, ai kơlo, tro troăng hơlâ ƀă ai rơkong tơpui leăng mơnhên krê xêh tung hnoăng tơplâ, hbrâ mơdât mâu tơdroăng xôi.

Drêng kố, pôa Phan Đình Trạc hiăng diâp 10 hnoăng tơmeăm ăm mâu rơpŏng ki lăm pro kăch măng nah, la rêh ối, pêi cheăng rơkê kơhnâ djâ troăng lĕm tro tung pơlê kong kơdrâm Đà Lạt.