Roh hôp mê hiăng tối tơbleăng, Pơkâ mơjiâng Tôh tơrŭm cheăng pơla péa kong pơlê rak vế, pêi pro Troăng Tơkêa pêi ‘mâi rơnêu, pơhlêh, mơjiâng kơvâ khu pơkuâ cheăng dêi kong pơlê Dak Lak prế kong pơlê Phú Yên; ăm mâu kăn veăng tơpui tối ‘na Tơdroăng Tơkêa pêi ki chêh tối ahdrối vâ ‘mâi rơnêu, pơhlêh, mơjiâng khu pơkuâ râ kong pơlê; séa mơnhên ngăn, ăm mâu kăn veăng tơpui tối ‘na luât, troăng pơkâ, po troăng hơlâ la ngiâ tung ‘mâi rơnêu, pơhlêh, mơjiâng khu pơkuâ ngăn cheăng; túa ki vâ pơtối mơnhông mơjiâng hngêi pêi cheăng, troăng prôk, pơkâ rah xo mâu rơxế pơto chơ mâu kăn lăm pêi cheăng, liăn ngân, tơdroăng tŏng gum ăm kăn ƀô̆, mơngế pơkuâ, mơngế cheăng tơnêi têa ƀă hên mâu tơdroăng ki ê.

Mâu kăn dêi péa kong pơlê hiăng vâ môi tuăn tiô tơdroăng ki hiăng pơkâ chêh tung Tơkêa Pêi mê. ‘Na tơdroăng tí tăng, rah xo rơxế vâ pơto mâu kăn pêi cheăng ƀă hngêi ối tơdjuôm ăm kăn ƀô̆, mơngế pơkuâ ing Phú Yên lăm pêi cheăng a kong pơlê Dak Lak, mâu kăn ai tối tiah kố, kal athế pơcháu hlối ‘na liăn ngân, rơxế, kế tơmeăm, lơ ai liăn tŏng gum ăm mâu kăn ƀô̆, vâ vâi tơ’lêi ai xêh rơxế prôk lăm pêi cheăng, hngêi ối pơtân ki vâ pêi cheăng.