Pơchuât tơbleăng a rôh hôp, teăng mâ Khu xiâm mơjiâng pro tơmeăm ăm ‘nâi: 05 tơdroăng tơkêa pro troăng kân a kơpong tơbăng Kroăng Cửu Long ai tâi tâng ki xŏn dâng 206km. Tiô pơkâ kô pro klêi a hơnăm 2025 ƀă nôkố mâu tơdroăng tơkêa kố pơrá dế tơbleăng rak tơniăn tơdroăng ki pro, mâu tơdroăng xơpá, tơvâ hiăng châ tŏng gum.

Ngế pro xiâm hnê ngăn tơnêi têa pơkâ thế mâu khu râ, mâu kơvâ cheăng athế rĕng pêi, rơkê xúa mâu troăng pơkâ, liăn ngân ki tơ’lêi hlâu má môi vâ pro iâ ‘nâng ‘nâi hâi khế pơkâ pro, hlá mơ-éa ăm phêp, chiâ xo mâu prêi hmốu a tíu ki nếo vâ pêi châ tơdroăng púi vâ pro, khu ki xo pro séa ngăn kơtăng tung tơdroăng pơkâ, pơkâ pơtroh mâu ngế cheăng, kơmăi kơmok ki pro, mâu liăn ngân vâ tơkŭm pro “3 rôh, 4 khu” vâ rak tơniăn pro klêi mâu tơdroăng tơkêa pro tro hâi khế pơkâ, dâi, tơniăn dêi mâu kế tơmeăm ki châ pơkâ pro.