Tung pơla hdrối nah, tơrŭm cheăng kal kí, tơpui tơno pơtối mơnhông tơniăn lĕm, thăm rế hmâ ƀă loi nhoăm dêi pó. Péa pâ kơhnâ tơpui tơno tâi tâng khu trâm mâ mâu kăn rêm râ, veăng mơhno troăng pêi tung tâi tâng tơrŭm cheăng péa pâ. Tơrŭm cheăng lêng - kring tơniăn pơla péa tơnêi têa pơtối châ mơnhông tá ki lĕm ƀă tơƀrê. Péa pâ kơhnâ tơbleăng mâu tơdroăng tơhrâ mâu tơdroăng tơhrâ, pơkâ tơrŭm cheăng; tơrŭm rak ngăn tơdroăng mot lo tung tơnêi têa dêi pó; hriăn tăng ‘nhiê troăng dêi mâu khu ‘mêi, tăng rŭm mâu ki ai xôi tơkâ luâ tíu tơkăng kong.

Tơrŭm cheăng kâ - tê mơdró ƀă ‘no liăn cheăng pơla péa tơnêi têa pơtối pơ’lêh hên. Bâ pro tơ’lêi hlâu ăm khu mơdró ƀă kuăn pơlê péa tơnêi têa, péa pâ kĭ tung hlá mơ-éa chôu pâ ‘na mơnhông ƀă tơdjêp tê mơdró tíu tơkăng kong pơla Việt Nam - Lếo, kĭ tơhrâ tê mơdró pơla Việt Nam - Lếo; tơbleăng pêi tơƀrê, Kĭ tơhrâ Tê mơdró pơla Việt Nam - Lếo. Kơnôm mâu tơdroăng mơ-eăm ing péa pâ, tơmeăm tê mơdró pơla péa pâ hơnăm 2024 hdró hôm drêng luâ 2,2 rơtal dollars, tâk 34% tâng vâ pơchông ƀă hơnăm 2023.

Hnê hriâm ƀă hnê mơjiâng tuăn ngôa rơkê ƀă túa lĕm tro cho mâu kơvâ tơrŭm cheăng châ péa tơnêi têa tơmâng khât. Nôkố, ai lối 14 rơpâu ngế hok tro Lếo dế hriâm a Việt Nam. Péa pâ dế thâ pêi tơdroăng Tơkêa bro tơrŭm hnê hriâm Việt Nam - Lếo pơla hơnăm 2021-2030 ƀă tơdroăng pơkâ kơthô chêh ‘na tơrŭm hnê hriâm pơla Việt Nam - Lếo. Pakĭng mê, péa pâ mơ-eăm pêi tiô Pơkâ tơrŭm mơhno túa lĕm tro ngê̆ thuât ƀă ôm hyô. Việt Nam veăng kum Lếo mơjiâng Troăng hơlâ mơnhông tơ’noăng ivá Lếo pơla hơnăm 2023-2030.

Tơrŭm cheăng pơla mâu kong pơlê, malối cho mâu kong pơlê ki ai tơdjuôm troăng tơkăng kong, pơtối mơdêk, rế tơmâng pêi trâu khât tâ, tŭm tơdroăng, veăng pro tơniăn a mâu kơpong tơkăng kong péa tơnêi. Mâu hnoăng pêi pro dêi Hơnăm Tơrŭm tơrôa pơla Việt Nam - Lếo 2022 xuân môi tiah hên tơdroăng pêi pro tơrŭm cheăng pơla mâu hơnăm hdrối, veăng mơnhông hlê plĕng dêi rơpó ƀă ‘mâi mơnhông tơrŭm cheăng pơla kuăn pơlê péa tơnêi têa.

Tung tơrŭm cheăng hên troăng, péa pâ tơrŭm krá khât, veăng kum  dêi rơpó a mâu hneăng hôp tung kơpong ƀă lâp plâi tơnêi, malối tung tơdroăng tơrŭm cheăng dêi mâu kong têa Đông Nam Á (ASEAN), Khu lâp kong têa ƀă mâu luât pơkâ dêi mâu kơpong.

Péa pâ tơkŭm po klêi Hneăng hôp rôh má 46 Vi ƀan tơrŭm cheăng Chin phuh ‘na tơrŭm pơla  Việt Nam - Lếo ƀă Rôh trâm mâ mâu kăn pơla Đảng Kŏng sản Việt Nam ƀă Đảng Nhân yân Kăch măng Lếo. Ing  tơdroăng tối ăm ‘nâi ‘na mâu tơdroăng tơrŭm cheăng ki lâi hiăng chiâng pêi pro, péa pâ môi tuăn ƀă mâu troăng hơlâ tơrŭm tung la ngiâ.

Tơrŭm cheăng ki kal iâ hlo pơla Việt Nam - Lếo dế châ pơtối tơbêng ing mâu tơdroăng pơkâ pêi tơdjuôm dêi péa tơnêi têa, ƀă ing tơdroăng lâp plâi tơnêi tơniăn lĕm, chông djâ kăch măng péa tơnêi têa chôa lâng prôk tơkâ luâ mâu pơloăng mơnúa, tơdroăng ki pá puât xâu rơ-iêo.

Việt Nam ƀă Lếo kô pơtối mơ-eăm mơdêk ƀă pro trâu rơdâ tâ nếo tơrŭm cheăng péa pâ, tơrŭm môi tuăn, tơrŭm tung tŭm tơdroăng, xua vâ pro pơxúa ăm kuăn pơlê péa tơnêi têa, xua vâ pro hơniâp lĕm ƀă mơnhông a kơpong ƀă tung lâp plâi tơnêi.