Tơpui a rôh leh tơbleăng, Kăn pơkuâ Học viện Chính trị quốc gia Hồ Chí Minh Nguyễn Xuân Thắng tối nhên, tung pơla hdrối nah, Đảng, Tơnêi têa pin hiăng pơkâ hên troăng hơlâ, tơdroăng tŏng gum, luât vâ mơjiâng tơdroăng pơhlêh kơxô̆, mơdêk tơdroăng ki pơhlêh kơxô̆ tŭm têk. Malối Pơkâ 57 dêi Khu xiâm pơkuâ tơdroăng kal kí hiăng mơnhên, mơjiâng khoa hok, kong ngê̆, pơhlêh nếo tơmiât pêi rơkê ƀă pơhlêh kơxô̆ tơnêi têa cho tơdroăng mơnhông kal xiâm, ivá xiâm vâ mơnhông rĕng khu ki mơjiâng pro rơkê plĕng, ăm tơnêi têa mơnhông tơƀrê, kro mơdrŏng tung chal ki nếo.

Kăn pơkuâ Học viện Chính trị quốc gia Hồ Chí Minh Nguyễn Xuân Thắng pơkâ thế, tung la ngiâ ah, hngêi trung Học viện ƀă mâu Hngêi trung Chính trị tung lâp tơnêi têa kal pêi pro mơnhông tơƀrê ‘na khoa hok kong ngê̆, pơhlêh nếo tơmiât pêi rơkê ƀă pơhlêh kơxô̆ sap ing hnoăng pơkuâ pơkuâ ngăn, pêi cheăng, troh hnê cheăng pêi, hnê tâi tâng, mơnhông tơƀrê, hnê tơdroăng ki kal, ki xiâm vâ pơhlêh kơxô̆ cho ivá ăm tơdroăng ki mơnhông.