Veăng pêi pro tơdroăng a Plông kân lơ 1/4, pơlê kong kơdrâm Tuy Hòa, kong pơlê Phú Yên, Khu xiâm ngăn túa lĕm tro, tơ'noăng ivá ƀă ôm hyô Dak Lak tơkŭm pêi mâu tơdroăng mơđah tơbleăng, mơhno tơdroăng cheăng teăn hmôu jiâ dêi mơngế Rơđế, tơdroăng meăn pro tơmeăm ƀă tơnêi hneăn dêi mơngế M’Nông. Mơđah rêi prôa, tôu chêng koăng, hơkâ dêi kuăn ngo, hơdruê, rơngêi, mơhno túa lĕm tro, mâu ƀai hơdruê tơbleăng tối ‘na pơlê pơla tơnêi tíu, kuăn mơngế Dak Lak.

Tơbleăng “Tuăn ngôa rơkê pêt ƀă pro  tơmeăm, uâ pơliê kơphế Dak Lak’’, ngăn hơ’lêh kơphế ƀă mơnúa ôu kơphế tê kơtê. Tơkŭm po mini game, ăm phĭu lăm hêi, ôm hyô Dak Lak. Pôa Đại Đức, Phŏ kăn pơkuâ ngăn túa lĕm tro, tơ’noăng ivá ƀă ôm hyô Dak Lak ăm ‘nâi,  mâu tơdroăng tơbleăng, tơdjêp ôm hyô pơla Dak Lak ƀă Phú Yên hiăng châ pơkâ ing hdrối, vâ pro rế hên tơdroăng xah hêi pêi pro drêng troh tơbâ 50 hơnăm hâi châ tơleăng lĕm peăng Hdroh tơnêi têa, lâp tơnêi têa tơrŭm môi; veăng mơnhông ôm hyô, vâ pêi pro tơdroăng pơkâ mơnhông cheăng kâ lối 8% tiô tơdroăng hiăng pơkâ.