Kơxo hâi lơ 27/3, Vi ƀan tơring Phú Thiện hiăng tơkŭm po mơdĭng rơkâu xối pâ kong mêi dêi Xeăng pơtáu Apui ƀă Hneăng tơ’noăng khôi túa lĕm – tơ’noăng ivá mâu hdroâng kuăn ngo roh má XVI a Kơpong tíu chôu ‘măn tơmeăm khoăng ton nah – khôi túa lĕm tơnêi têa Plei Ơi (cheăm Ayun Hạ, tơring Phú Thiện, kong pơlê Gia Lai) vâ mơdah tơbleăng tơmeăm kơnía khôi túa lĕm ƀă tơmeăm ki ai hlâu cheăng kâ – rêh ối pơlê pơla, mơhnhôk tơmối ƀă khu mơ’no liăn cheăng tung kơvâ ôm hyô.

Mơdĭng rơkâu xối pleăng pâ kong mêi tơkŭm po a kối ngo xeăng Chư Tao Yang, xua pôa Siu Phơ, ngế kum cheăng rơxông Pơtáu on má 14, rơtế ƀă khu krâ pơlê ƀă ngê̆ nhân veăng kum pơkuâ. Rơkong xối pleăng pâ kong tơnêi djâ ăm kong mêi tro tô ‘ló, kum loăng hŭn lĕm ƀă kuăn pơlê rŭm môi tuăn, ó rơdêi, tơkâ hluâ tâi tâng tơdroăng ki kong prâi pro ôh tá tơniăn. Rơtế ƀă leh xối cho Hneăng tơ’noăng khôi túa lĕm – tơ’noăng ivá, ƀă hên tơdroăng môi tiah mơđah tơbleăng chêng koăng, teăn tơmeăm, pong rơgi loăng, teăn ếo pơtâk hdroâng kuăn ngo, ƀă mâu tơdroăng xah hêi môi tiah to chêng klĕng, pĕng mơnĕng ƀă tơdúa kơxâk.

Ki rơhêng vâ tối, tơ’noăng kơtâu dó inâi ‘’Tiô kơteăng chêng Pơtáu On’’ xuân châ tơkŭm po, pro tơdroăng ki kơdrâm phiu ro ăm leh mơdĭng./.