A Buôn Ma Thuột, kơphế hiăng chiâng khôi túa, vêa vong ki tơdjêp, tơrŭm pơla kuăn mơngế. Nâ Phạm Thị Thanh Nga, môi ngế kuăn pơlê a pơlê kong kơdrâm Buôn Ma Thuột ai tối tiah kố, kuăn pơlê a tíu kố ôu kơphế vâ pơxiâm pêi pro hnoăng cheăng a kơxo má, cho hâi ki nếo:

“Ƀă vâi krâ-nhŏng o a Buôn Ma Thuột mê kơphế hiăng chiâng môi tơmeăm khoăng ki ôu ôh tá păng lôi. Ôu kơphế ôh tá xê to tơdroăng ki hmâ, mê ối vâ gum ăm pin châ tơ’lêi trâm pú hmâ, vâi krâ-nhŏng o, tơpui tơno mâu tơdroăng pêi cheăng kâ, ƀă ki rơhêng vâ tối cho rơkong tơpui ƀă mâu vâi pú hmâ rơtế ai tơmiât, ai pêi pro tiô hnoăng ki tơná hiăng pói vâ. Kơphế ƀă á cho kế ôu ki hiăng hmâ rêm hâi, tâng ôh ta ai kơphế kô ôh ti păng chiâng, ôh tá tơniăn”.

Ôh ta xê to hmâ, mê kơphế ối cho tuăn hiâm ki hâk git ƀă xuân cho roh ki vâ gum ăm hên ngế châ vêh ƀă dêi xiâm kối. Ngoh Y Pốt Niê, Ngế rơtăm hdroâng Rơđế, maluâ hiăng hơngế dêi ing pơlê vâ hriâm pro ƀok thái pơkeăng, la ing tuăn i hiâm chôu vế dêi ki pơ-ou lĕm kơphế dêi nôu, dêi pâ hiăng pro phoih tung hiâm mơno ngoh prếo vêh dêi a pơlê cheăm, ing mê, ngoh hiăng mơjiâng pro inâi kơphế Rơđế. Pêi pro lĕm tro túa ki hơ’lâk kơphế tiô khôi hmâ dêi hdroâng kuăn ngo tơná, ngoh hiăng mơnhông pro “Kơphế têng a drá peăng” dêi tơná châ kơneăng chhâk hơngế, ôh ta xê to túa kơphế mê ối cho tơdroăng hơ’muăn tối ‘na túa lĕm tro, ‘na kơpeăng kŏng ki rơkê dêi tơdroăng kơhnâ rơkê khât, mơjiâng chiâng ăm tơmeăm kơphế”.

Ƀă Ngế droh ki lĕm rơduăng – H’Hen Niê tối, kơphế cho tơmeăm khoăng ki hiăng hmâ ƀă nâ sap ing ối tơxĭn nah ƀă kế ôu ki xú pơ-ou, chúa vế tung hiâm mơno. Mơhum mâ ƀă xông kân a môi pơlê kơtiê a tơring Čư̆ Mgar, kong pơlê Dak Lak, sap ing ối tơxĭn nah, nâ hiăng hmâ ƀă loăng kơphế. Rêm hdroh tối ‘na kơphế, Ngế ki lĕm rơduăng H’Hen Niê hơniâp  ro ai tối tiah kố:

“Tiô tơdroăng ki á ngăn hlo ‘na kơphế, kơphế cho tơdroăng ki tơrŭm, tơdjêp, kơphế cho tơdroăng mơjo pâ, kơphế cho roh ki vâ tơ’lêi hlâu tung rêh ối, cheăng kâ. Tối ‘na kơphế cho tơdroăng ki tơdjêp mê cho tơrŭm pơla mâu ngế tung rơpŏng hngêi. Á hiăng châ ôu kơphế dêi nôu pâ, jâ pôa. Rêm kơxo má, drêng tâng í hmong rŏng, ai ngế ki hiăng pế têa tôu vâ bro kơphế vâ rơpŏng châ ôu, drêng pơla ôu kơphế tiah mê, rêm ngế ối bro tơ’nôm vâ djâ tơvế lăm a chiâk a deăng. Kơphế cho tơdroăng mơjo pâ drêng á ôu môi kơ’lo kơphế ulâi mê ‘lo, á kô khíu pâ troh dêi nôu pâ, hngêi trăng, pơlê cheăm, khíu pâ troh a kloăng kơphế”.

Tiô jâ Niê Thanh Mai, Kăn hnê ngăn Hô̆i Văn hok ngê̆ thuât kong pơlê Dak Lak tối, túa lĕm tro kơphế hiăng chiâng i hiâm, cho môi pâ ki ôh tá păng lôi tung tơdroăng rêh ối rêm hâi dêi kuăn pơlê a Buôn Ma Thuột.

“Ƀă ngin, mê kơphế cho túa lĕm tro, kơphế cho ki xiâm mơjo pâ ƀă  tơdrêng amê, kơphế cho tơdroăng ki tơrŭm, tơdjêp. Ngin hlo tiah kố, rêm  xôh Leh tơbleăng kơphế pơrá ai mâu tơdroăng ki vâ tối pơtâng pơrá phá dêi pó, ƀă tơdroăng ki xiâm dêi hơnăm kố, tiô ngin hlo mê kơphế cho tơdroăng tơrŭm, tơdjêp khôi túa lĕm tro pơlê pơla, vêa vong ki tro ‘ló dêi mâu hdroâng kuăn ngo ki rêh ối tung kong pơlê kố. Ki rơhêng vâ tối, ga kô tơdjâk troh, bâ eăng hên mâu kơvâ ki ê ƀă mơhno mơnhên túa lĕm tro tiô khôi hmâ vâi krâ nah dêi mâu hdroâng kuăn ngo ƀă kơphế”.

Leh tơbleăng Kơphế Ƀuôn Ma Thuột roh má 9 hơnăm 2025 a Dak lak dó inâi: “Ƀuôn Ma Thuột-Tíu ki troh dêi kơphế lâp plâi tơnêi”, pôa Nguyễn Hồng Phúc, Ngế ki chêh bro, tơdjâ tơdroăng ki pơxiâm mơđah a kơmăng hâi pơxiâm po leh tơbleăng kơphế ai tối: Kố ôh tá xê to tơdroăng ki vâ pơ-ôu ‘na kơphế mê ối cho roh ki vâ lâp plâi tơnêi hlê plĕng nhên ‘na ‘na khôi túa, vêa vong dêi Tây Nguyên, tíu ki kơphế pơtroh mâu ki kơnía tung tơrŭm, tơdjêp mê.

"Ai péa tơdroăng ki xiâm mê cho hiâm mơno dêi kuăn pơlê kơnôm ing kơphế khoh châ tơrŭm ‘na khôi túa, vêa vong dêi 49 hdroâng kuăn ngo nhŏng o, mê cho tơdjêp ki kơnía git pơla kơpong, kong têa, ôh tá xê tíu ki lâi xuân ai tiah mê, ƀă tung mê, pin kô châ pơ-eăng khôi túa, vêa vong, ‘na ki dâi lĕm dêi kơphế dêi hdroâng mơngế pin, ƀă tung tơdroăng ki po mơđah, tơbleăng mê, xuân ai um méa ki vâ hlo nhên hiâm mơno ngăn, plĕng, klê ‘na kơphế cho achê ƀă kuăn pơlê, mot tung khôi túa vêa vong rêm hâi dêi kuăn pơlê tung rêh ối, cheăng kâ”.

Pơla túa rêh ối chal nếo nôkố, tơrêm kơto kơphế Buôn Ma Thuột cho ‘nâng cho kế ôu ki xú pơ-ou lĕm dêi pơlê pơla, dêi kong kế ki hiăng ai sap ing chal ton nah troh nôkố. Mê cho tơdroăng hơ’muăn tối ‘na kuăn mơngế, ‘na khôi túa lĕm tro ki châ tơdjêp, tơrŭm, pơ-ôu pơ-eăng ‘na tuăn i hiâm mơjo pâ, mơnâ git dêi pó.