Pôa Tô Lâm, Kăn xiâm pơkuâ hnê ngăn Đảng, pôa Phạm Minh Chính, Ngế pro xiâm hnê ngăn Tơnêi têa, pôa Trần Thanh Mẫn, Kăn xiâm hnê ngăn Kuô̆k hô̆i rơtế mâu khu Kăn cheăng tung Khu xiâm kal kí, Kăn pơkuâ hnê ngăn cheăng Đảng tơnêi têa veăng amê pôa Tô Lâm, Kăn xiâm pơkuâ hnê ngăn Đảng tối ăm ‘nâi, hriâm tâp chuyên đê ‘na khoa hok kŏng ngê̆, pơhlêh nếo tơmiât pêi rơkê ƀă pơhlêh xúa kŏng ngê̆ tơnêi têa ối tung pơkâ pêi, tơdroăng pêi cheăng dêi Khu xiâm kal kí, Khu pơkuâ hnê ngăn cheăng Đảng, kố cho tơdroăng pêi ki nhên, mơnhên tơdroăng khŏm mơ-eăm hên dêi khu râ kăn pơkuâ hnê ngăn Đảng, Tơnêi têa pêi pro ƀlêi trâng Tơdroăng pơkâ 57 dêi Khu xiâm kal kí.

Vâ pơkuâ, hnê mơhno ƀă tơkŭm pêi pro châ tơƀrê Tơdroăng pơkâ kố mê mâu cho mâu Kăn cheăng tung Khu xiâm kal kí, Kăn cheăng tung khu pơkuâ hnê ngăn cheăng Đảng djâ troăng ahdrối tung hriâm tơdroăng ki rơkê ƀă kơvâ nếo, pá ƀă pơhlêh đi đo kố.

Kăn xiâm pơkuâ hnê ngăn Đảng pơcháu Đảng ŭy Chin phuh ƀă Ƀơrô Xiâm Đảng, kơ koan hnê mơhno má môi dêi Khu hnê mơhno tơnêi têa ‘na mơnhông khoa hok, kŏng ngê̆, pơhlêh nếo tơmiêt pêi rơkê ƀă pơhlêh xúa kŏng ngê̆ tơmâng xo tŭm rơkong tơpui dêi mâu Kăn cheăng tung Khu xiâm kal kí, Kăn xiâm pơkuâ hnê ngăn Đảng Tơnêi têa vâ tơ’nôm, kêi đeăng tơbleăng kum ăm hneăng hôp Tơnêi têa 11 la ngiâ, tung mê kal tơtrŏng cho tơ’nôm mâu troăng pêi ki nếo tung lâp plâi tơnêi ‘na khoa hok kŏng ngê̆ pơhlêh xúa kŏng ngê̆, pơhlêh nếo tơmiêt pêi rơkê, mơhno mâu tơdroăng ki kal inhên mâu troăng pêi vâ po rơdâ pêi pro châ tơƀrê Tơdroăng pơkâ 57 dêi Khu xiâm kal kí tung la ngiâ.